Oslo gávpotstivra lea ovttajieanallaččat mearridan dan ovdalaš juovllaid.
Gávpoga virggálaš lullisámegiel namma lea dál Oslove. Seammás gávpotstivra lea mearridan sáddet ohcama Gielda- ja guovlodepartementii oažžut suohkanii maid sámegielnama.
Dan dieđiha NRK Sápmi.
Davvisámegillii dat šattašii Oslo suohkan dahje gielda.
Julevsámegillii livččii Oslo suohkan.
Lullisámegillii dat šattašii Osloven tjïelte.
Ovddádusbellodat lei áidna bellodat mii jienastii vuostá sáddet ohcama departementii oažžun dihtii sámegielnama Oslo suohkanii, muhto doarjjui gávpoga sámenama.
