Áiddo álggahuvvon Oslo juoigankoarra guoimmuha gussiid Oslo ráđđeviesus Sámi álbmotbeaivvi. Dat 500 guossi besset maid gullat musihka ja sártniid dan beaivvi.
Oslo sátnejođiheaddji Anne Lindboe jáhkká dát šaddat hávskes beaivin.
– Sámi álbmotbeaivi lea dehálaš min gávpogii. Mii dárbbašat máhtu ja áddejumi sámi gielaid, kultuvrra ja árbevieruid birra. Lean hui ilus go mii leat 21 jagi juo bovden sápmelaččaid boahtit Oslo ráđđevissui ávvudit dán beaivvi. Jáhkán dát šaddet albma ávvudeamit, lohká sátnejođiheaddji Lindboe preassadieđáhusas.
Son muitala Sámi álbmotbeaivvi doalut álget juo iđđedis ovcci áiggi go sámi leavga gessojuvvo leavgastággui ráđđeviesu šiljus. Sátnejođiheaddji Anne Lindboe, gávpotráđđejođiheaddji Eirik Lae Solberg, Sámi álbmotbeaivvi lávdegotti ovddasteaddjit ja Sámi viessu bohtet. Ávvudeami oktavuođas čuojahit ráđđeviessobiellut sihke Norgga nationálalávlaga ja Sámi soga lávlaga.
Prográmma álgá tiibmu 10.50 go sátnejođiheaddji Anne Lindboe váldá vuostá Sámedikki ráđđelahtu Mikkel Eskild Mikkelsen, ja Sosialisttalaš gurutbellodaga jođiheaddji Kirsti Bergstø. Tiibmu 11.00 álget doalut Oslo juoigankoarain mii lávlu Norgga nationálalávlaga, dasto sávvá sátnejođiheaddji buresboahtima. Láidesteaddji guovttos Agnes Kielland Einejord ja Ida Benonisen almmuha vuos ahte Cizáš, Oslo sámi mánáidgárddi mánát lávlot guokte lávlaga, dasto ges lea sámediggeráđđelahttu Mikkel Eskil Mikkelsen gii doallá sártni ja Oslo sámi skuvlla oahppit lávlot guokte lávlaga. Beaivvi váldosárdnideaddji lea OsloMet historihkkár ja seniordutki Mikkel Berg-Nordlie ja su maŋŋá lávlu Máret Áile Gaup Beaska ja čuojaha stuorra piano. Loahpas ovdalgo doalut nohket, rohttesta Oslo juoigankoarra guokte luođi ovdal go doalut nohket.
