-Almmuhus-
-Almmuhus-
OĐĐASAT ON ávžžuha Suoma nannet Sámi rivttiid

ON ávžžuha Suoma nannet Sámi rivttiid

-

-

Ovttastuvvon našuvnnaid olmmošvuoigatvuođakomitea ávžžuha Suoma čuovvut internationála konvenšuvnna mii guoská siviila ja politihkalaš vuoigatvuođaide, seammás go nannejit sámi rivttiid. 

Komitea ávžžuhusat gusket earret eará vašširihkkosiidda, nissoniidda geat leat vásihan veahkaválddi ja sámi rivttiide. ON olmmošvuoigatvuođakomitea ávžžuha maiddái Suoma ovddidit sámediggelága ođasmahttima. Dát paragráfat gusket sápmelašmeroštallamii ja ráđđádallangeatnegasvuhtii.

Ávžžuhusaid mielde galgá Suopma maid vihkkedallat ILO soahpamuša 169 ratifiserema ja lasihit rahčamušaid sihkkarastima dihtii ahte ráđđehusas ja báikkálaš virgeolbmuin, poliissain, sivaheddjiin ja duopmáriin lea áššáigullevaš skuvlejupmi vuoi nagodit ja máhttet gudnejahttit sámiid vuoigatvuođaid eamiálbmogin.

Tuomas Aslak Juuso dadjá Sámedikki preassadieđáhusas ná;

– Lea čielggas ahte Suopma galgá ollašuhttit olmmošvuoigatvuođakomitea árvalusaid ja ávžžuhusaid, erenoamážit sámediggeláhkaođastusa. Sámediggeláhka galgá dál leat jođus ođastusproseassas rievdadit KP-soahpamuša mieldásažžan. 

Suoma riekteministeriija ráđđádalli Yrsa Nyman dadjá kommentaras Yle Sápmái ahte dát ávžžuhusat ledje vuordimis. 

– Lea ásahuvvon doaibmagoddi, mii válmmaštallá rievdadusaid sámediggeláhkii. Ulbmilin lea oažžut Sámedikki dohkkehan evttohusa riikkabeivviide nu jođánit go vejolaš. ILO 169 ratifiseremiin letnet maid bargame fas. Ráđđehusprográmmas čuožžu ahte riekteministeriija galgá ráhkadit ovdačielggadeami ratifiserema gáibádusain ja eavttuin, dadjá Nyman Yle Sápmái

Deaŧalaš soahpamuš

Suoma Sámedikki ságadoalli Tuomas Aslak Juuso cealká Yle Sápmái

– Mus lea sávaldat ahte Suopma váldá daid duođas. Mun jáhkán ahte livččii gierdameahttun dilli Suoma stáhtas diđolaččat joatkit siviila politihkalaš rivttiid konvenšuvnna loavkideami. Galhan dál lea áigi divvut sámediggelága, dat lea dál guovddáš ášši, dadjá Juuso. Dieđusge ILO 169 -soahpamuš lea máilmmi dehálaš ášši. Ovdáneapmi dáinna ráđđehusain dáidá gal báhcit dušše dakkár čielggadeami dássái. Dieđusge dat lea dehálaš ávžžuhus stáhtii, ahte dat fertejit dáinna áššiin bargat nu ahte dat ratifiserejit dan, dadjá Juuso.

Suopma galgá vástidit ON:a ávžžuhusaide maŋimuštá njukčamánu 26. beaivve 2022.

-Almmuhus-