Olusat váldán nuvttá HPV-boahku

Nieiddat, geat leat šaddan maŋŋel 1991, leat ožžon fálaldaga nuvttá boahkuhuvvot HPV-dávdda vuostá. HPV sáhttá dagahit mánágoahtečottaborasdávdda.

Álbmotdearvvašvuođainstituhtta dieđiha dál ahte leat 83 877 nieidda váldán fálaldaga.

– Lea somá go nuvttá boahkku lea boktán nu olu fuomášumi. Čájeha ahte nuorra nieiddat háliidit iežaset várjalit borasdávdda vuostá, lohká doavttir Margrethe Greve-Isdahl Álbmotdearvvašvuođainstituhtas.

– Lea dehálaš muitit váldit buot golbma boahku, vai lea buoremus ávki boahkuin, lasiha son.

Rievddada

Son ii bala das go rievddada báikkis báikái olusat váldet boahku.

– Dat ii muital maide, ja das eat sáhte konkluderet maide, go boahkku registrerejuvvo nieidda ruovttučujuhussii. Jus soames Moldes váldá boahku Oslos, de dat registrerejuvvo Moldes, lohká Greve-Isdahl.

– Min mihttu lea juohkit dieđuid buohkaide geat leat ulbmiljoavkkus, vai ieža sáhttet válljet, deattuha son.

Instituhtta oaidná erohusaid olbmo dilis. Sis geain ii leat fásta beallelaš, lea eambbo beroštupmi váldit boahku, ovdalii go sii geain lea fásta beallelaš.

– Mii geahččalit gaskkustit ahte buohkat berrejit váldit boahku. Vaikke dus lea fásta beallelaš dál, de sáhttá dat rievdat moatti jagi geahčen, ja boahkku ii leat nuvttá earret go dál, lohká son.

Bures suddje

Eanaš HPV-infekšuvnnat mannet ieža badjel, muhto eai buot. Jus HPV-infekšuvdna bistá, de lassána maid várra oažžut ceallarievdamiid mánágoahtečoddagii. Jus dat beassá viidánit, de šaddá borasdávdan.

Liigeváikkuhusat leat dávjjimusat leamaš oaivebávččas, bávččas gokko boahkku lea biddjon, oaivejorggis ja feber.

– Dát liigeváikkuhusat mannet badjel moatti beaivvis. Dat ii dagat ahte eat goit ge ávžžut váldit boahku, lohká Greve-Isdahl. (©NTB)