Eanet oahppit go ovdal válljejit dál gazzat sámegieloahpu Oulu universitehta bakte go sii ovttasbarget Sámi oahpahusguovddážiin, Anáris.
Oktiibuot 25 oahppi leat lohkan Oulu universitehta anáraš-, nuortalaš- dahje davvisámegiela jođálmahttojuvvon giellaoahpuid Anáris. Dábálaččat oahput bistet unnimustá guokte jagi ja daid čađahit jahkásaččat vuollel logis. Oahput ollašuhttojedje ovttas Sámi oahpahusguovddážiin.
– Dát lohkomearri lea mearkkašahtti go veardida dan dasa man unnán sámegiela hállit oppanassiige leat, illuda Giellagas-instituhta hoavda Ánne-Sire Länsman Oulu universitehtas preassadieđáhusas.
Prošeakta
Sámegielaoahpu gullá «Ketterä korkeakoulu» -prošektii. Sin ordnejit maid oahpaheaddji pedagogalaš oahpuid. Dat oahpahus leat oaivvilduvvon boahttevaš ávnnasoahpaheddjiide: sámegiela ja girjjálašvuođa oahpaheddjiide ja daidda geat háliidit oahpahit sámegillii eará oahppoávdnasiid. Oahpaheaddji pedagogalaš oahput lágiduvvojit eanas Anáris, muhto maid gáiddusin.
– Dat ahte studeanttat ledje nu ollu, čujuha dasa ahte allaskuvlaoahpuide lea dárbu maid Sámis. Ollugiidda lea váttis vuolgit máŋgačuođi kilomehtera duohkai Oului dievasmahttit iežas dutkosa, suokkarda Giellagas-instituhta prošeaktakoordináhtor Tiina Mattanen.
Ovttasbargu
Ketterä korkeakoulu prošeavtta lágidit Oulu universitehta Giellagas-instituhtta ja pedagogalaš diehtagiid dieđagoddi ovttas. Ulbmilin lea skuvlet jođánit eanet sámegielat oahpaheddjiid, das go oahpaheddjiide lea stuorra dárbu buot golmma sámegielas.
Dan prošeavtta doarju Suoma oahpahus- ja kulturministeriija. Sii lágidit maid Sámi girjjálašvuođa oahpuid ja dan studerejit oktiibuot 20 oahppi. Nu čálla Giellagas-instituhtta preassadieđáhusas.
