2007 rájes leat badjel 60 dáhpáhusa leamaš Equinor gássarusttegis Hámmárfeasta olggobealde. Lea juogo buollán, suovastišgoahtán dahje lea gássa suođđan rusttegis.
NRK lea kárten dáhpáhusaid LNG-doaimmas , Muolkkuin sullos olggobealde Hámmárfeasta.
Oktiibuot leat 178 sávakeahtes dáhpáhusa dieđihuvvon Petroleumstilsynet:ii dan rájes go doaibma lea rahpasan 2007:s. Dáin leat 68 dáhpáhusa main lea leamaš buollin, gássasuođđan dahje lea suovastišgoahtán.
SAFE searvvi jođiheaddji, Hilde-Marit Rysst oaivvilda ahte leat leamašan beare olu dáhpáhusat. Sii vurdet ahte sihke Muolkkuid ja Equinora njunnošat bargagohtet eastadit dákkár dáhpáhusaid geavvamis. Son čujuha maid ahte dáhpáhusaide sáhttá sivvan jus leat beare unnán olbmot barggus.
Sihkkarvuohta
Andreas Sandvik, Hammerfest LNG doaibmajođiheaddji, lohká ahte leat alla logut danin go sis lea buorre dáhpi dieđiheapmái, ja deattuha ahte sihkkarvuohta lea sis ovddemusas.
– Mii dieđihit buot dáhpáhusaid, maiddái smávva áššiid mat dáhpáhuvvet rusttegis, dadjá Sandvik.
Dán dieđiha NTB preassadieđáhusas.
