Energiijaministtar Terje Aasland (Bb) evttoha dakkár čovdosa mas stáhta váldá badjelassii gássafápmorusttega jus ii leat doarvái fápmobuvttadeapmi dalle go Muolkkut galgá elektrifiserejuvvot.
– Okta čoavddus sáhttá leat ahte vuoigatvuođalaččat doaimmahit rusttega erenoamáš áigodagaid, dahje ahte stáhta váldá dan badjelassii, muitala Aasland Muolkkuid gássarusttega birra Europowerii.
Priváhta vuođđudusa European Green Table (EGT) raporttas čilgejuvvojit menddo alla fápmohattit Finnmárkkus 2030 rájes danne go eai boađe doarvái ođđa fápmobuvttadeamit dalle go Muolkkut galgá elektrifiserejuvvot.
Dat vuorjašuhttá stuoradiggeáirasa Terje Hallelanda (Ovddádusbellodat), gii lea váldán ovdan ášši stáhtaráđiin.
– Ávžžuha go stáhtaráđđi Snøhvit-liseanssa oasálastiid veahkehit 3,3 TWh ođđa fápmobuvttademiin ja 381 MW ođđa beavttuin Finnmárkkus? Vai áigu go stáhtaráđđi sihkkarastit dárbbašlaš elektrihkalaš fámu ja beavttu Finnmárkui maiddái maŋŋel 2030 eará ládje? jearrá Halleland.
Aasland lea hutkan máŋga čovdosa jos i leat doarvái el-fápmu sajis.
– Mii leat bidjan vuođđun ahte jos el-fápmodilálašvuođa geažil lea dárbu, de áigu departemeanta ovdal ođđajagemánu 1.b. 2030 gulahallat vuoigatvuođaoamasteddjiiguin gávdnan dihtii šiehtadusvuđot čovdosiid mat sihkkarastet dáláš energiijarusttega doaimma muhtun áigodahkii, dadjá son.
EnergiWatch namuhii ášši vuosttažin. (©NTB)
