Olmmáivákki váriid gaskkas jupmá fas máilmmimusihkka dán geasi

Eamiálbmotjienat čájehit eamiálbmogiid saji dálááiggis go Riddu Riđđu lea veahkehan rahpat čalmmiid ođđa eamiálbmotkultuvrraide dan 25 jagis.

Riddus erenoamáš jurddašanvuogit

Riddu Riđđu almmuha erenoamáš buvttademiid, jurddašanvugiid ja internašunála ovttasbargguid, mat leat moadde dehálaš oasi dán jagáš prográmmas.

– Riddu Riđđui lea ain dárbu, ja lea ain ollu bargu mii ferte dahkkot eamiálbmogiid kulturipmárdusa ja rivttiid ektui. Go čájehit kultuvrra ja ságastallat kultuvrraid birra, de movttidahttit buohkaid dovdat oadjebasvuođa iežas kultuvrii ja viiddidit gierdevašvuođa earáid vuostá, muitala Riddu Riđu festiválajođiheaddji Karoline Trollvik preassadieđáhus.

Eamiálbmogat ođđaáiggis

Prográmma bistá gaskavahkkus sotnabeaivái suoidnemánu 13. beaivvis gitta 17. beaivái Riddu Riđu giettis, ja lágideaddjit muitalit gehččiid beassat vásihit kurssaid, ođđa artisttaid, oahppat máilmmi eamiálbmogiid birra ja gullat sin musihka ja oaidnit sin dáidaga, dasa lassin go maid beassat dovdat dan liegga áibmogearddi festiválas.

– Fáddá, mii dán jagi čuovgá, lea eamiálbmotdáiddáriid deaivvadeapmi ođđaáiggiin, ja stuora eamiálbmotjienat deaivvadit Gáivuonas Davvi-Romssas geasset čájehan dihte eamiálbmogiid saji globála dálááiggis, muitala festiválajođiheaddji.

Ođđa oasit maid prográmmas

Prográmmas lea Riddu Sessions, Internašunála dáiddačájáhus, «Dancing Earth», klubbalávvu, Powerluohti, Hiphoparat geain lea eamiálbmotpolitihkka guovddážis, váldolávddi artisttat, davvi-álbmot, dán jagáš nuorra dáiddár, yurtakonsearta, kurssat, filmmat, seminára, dáidda, girjjálašvuohta, mánáidfestivála, nuoraid campa ja Riddu Siida.

Klubbalávvu lea okta ođas gos DJ čuojaha musihka maŋŋel go konsearttat nohket ja galgá čohkket olbmuid vai besset joatkit dánsuma.

Riddu Riđđu lea ráhkadan spotifyi čuojahanlisttu gos sáhtát gullat artisttaid geat čuojahit dán geasi festiválas Gáivuonas.