Deanu gieldda álbmotgirjerádju ja !Les leat rahpan girjekioskka Deanušalddis, gos olbmuin lea vejolaš fidnet nuvttá girjji vaikke makkár áigge jándoris. Ulbmil lea loktet álbmogis lohkanmiela.
2019:s rahppui vuosttaš girjekioska Norggas, ja dan maŋŋel leat miehtá riikka ihtán dákkár kioskkat. Deanu álbmotgirjerádju lea rahpan sin girjekioskka Deanušalddis. Romssas ja Finnmárkkus galget rahpat logi girjekioskka, dál leat girjekioskkat Deanus, Hámmerfeasttas, Honnesvágis, Čáhcesullos ja Várggáin.
– Dat lei nu somá go beasaimet doallat rahpandoaluid, go dalle fuomášit olbmot lohkankioskka. Ii leat ávki dušše ráhkadit ovtta lohkankioskka jus olbmot eai dieđe mii dat lea, lohká Deanu gieldda Álbmotgirjerádjosa hoavda Ragnhild Måsø Ávvirii.
Rahpandoaluin guoimmuhedje Deanu kulturskuvlla baleahttadánsejeaddjit ja Giellavealggu mánáidgárddi ovdaskuvlajoavku rohttii luođi.
Ođđa ja fiinna girjjit
Girjekioska lea ráhkaduvvon ovddeš telefuvdnakioskkas, mii leamašan guhká gaskkal MIX tigern kioskka ja Shell stašuvnna Deanušaldi guovddážis.
– Dat ii leat meinnet ahte olbmot galget deike buktit girjjiid maid eai fuola šat ruovttus ja mat leat billašuvvagoahtán. Dáppe galget leat fiinna ja buori girjjit maid olbmot háliidit lohkat. Vuolimussii lean bidjan mánáidgirjjiid mat leat ođđasat ja čábbát, lohká Måsø.
Nuvttá fálaldat birra jándora
Son lea láhčán girjekioskka dan láhkai ahte mánáidgirjjit leat gávdnamis vuolimus hilduin ja ollesolbmuid girjjit leat dain bajit hilduin girjekioskkas.
– Olbmot ožžot dáppe viežžat girjjiid nuvttá , váldit ruoktot ja dahkat maid háliidit daiguin. Jus eai buvtte ruovttoluotta de ožžot doalahit dan girjji dahje addit viidáset. Deike ožžot maid buktit ođđa čába girjjiid maid eai háliit šat, dadjá son.
Sámegiel girjjit maid kioskkas
Deanu Álbmotgirjerádjosa hoavda lohká sii bohtet váruhit ahte girjekioskkas leat álohii girjjit maid olbmot sáhttet viežžat ja lohkat. Son muitala girjekioskkas leat maid girjjit sámegillii, ja son áigu háhkat vel eambbo sámegielgirjjiid kioskii.
– Dat mii lea hástalus sámegiel girjjiiguin lea dat ahte olbmot eai báljo bálkes daid. Eanaš sámegiel girjjit mat dás leat, leat dás dan sivas go mis leat guokte gáhppálaga dain ja nu leat juolludan deike. Muhtin girjjiid leat ožžon kulturráđis, maid leat lohkan ja geargan. Dađibahábut eat ráske addit viidáset sámegielgirjjiid, muhto dat gártet okta nubbi, loahpaha Deanu gieldda Álbmotgirjerádjosa hoavda Ragnhild Måsø.
