Ollu jápminlihkohisvuođat johtolagas jagiin 2011 gitta 2015s sáhttet leat dáhpáhuvvan go olbmot čuggo mátketelefuvnnaid vuojidettiin. Stuora oassi Norgalaččain oaivvildit ahte mobiilageavaheami ovddas galgá oažžut čuoggáid vuodjinkortii ja sáhttit massit vuodjinlobi.
Ollu jápminlihkohisvuođat johtolagas jagiin 2011 gitta 2015s sáhttet leat dáhpáhuvvan go olbmot čuggo mátketelefuvnnaid vuojidettiin. Stuora oassi Norgalaččain oaivvildit ahte mobiilageavaheami ovddas galgá oažžut čuoggáid vuodjinkortii ja sáhttit massit vuodjinlobi.
Diibmá sáhkkohalle 20 458 biilavuoddji go vuojidettiin čuggo mátketelefuvnna. Dán rádjái leat addán 6969 sáhku dán jagi, čájehit ođđa logut Stáda bearranguovddažis.
2011-2015 áigodagas ledje 540 jápminlihkohisvuođa, ja 22 dain lihkohisvuođain čájehuvvo ahte mobiilageavaheapmi lei sivvan lihkohisvuhtii.
Dušše sáhkku, eai ge čuoggát
– Leat issoras alla logut, go čájehuvvo ahte telefuvdnageavaheapmi lea lassánan. Dalle sáhttá jáhkkit ahte eambbogat čálášit dieđuid telefuvnnain, čuggot telefuvnnaid ja isket sosiála mediaid vuojidettiin. Lea áigi čuovvolit eará riikkaid ja árvvoštallat čuoggáiguin ráŋggáštit vuodjinkoarttaid jus geavahit telefuvnnaid go vudjet biillain, lohká If diehtojuohkindirektevra Jon Berge preassadieđáhusas.
Dál lea nu ahte jus leat telefuvnna čuoggume vuojidettiin ja bissehalat johtolatiskkadeamis, de sáhkkohalat 1650 ruvnnuin, muhto it dine daid ráŋggáštusčuoggáid maiguin sáhtát massit guhkit áigái vuodjinkoarta.
Dorjot garraset ráŋggáštusa
Badjel bealli dain olbmuin geat leat jerron iskkadeamis, oaivvildit ahte livčče riekta eanet ráŋggáštuvvot go dál.
– Mii jearaimet maid lea go vuodjinmálle rievdan sis geat leat ožžon dakkár čuoggáid. Juohke logát ii lohkan rievdadan vuodjinmálle, nu ahte ráŋggášteapmi sáhttá leat buorre gaskaoapmin bissehit várálaš telefuvdnageavaheami, muitala Berge.
