Ávvir lea jearran iešguđet olbmuin Sámis mo sii ávvudit Sámi álbmotbeaivvi.
Anja Fjellgren Walkeapää
– Lean Johkamohkis álbmotbeaivvi, nu oassálasttán sihkkarit muhtun ávvudeapmái ovttas olbmáidanguin.
Ella Marie Hætta Isaksen
– Oslos! Álggos p3 morgen sáddagis. Dasto Oslo ráđđeviesus gos sátnejođiheaddji bovde iđitbiepmu borrat. Sámi Viesus leat dasto doalut olles beaivvi, ja eahkes Mari Boine čuojaha Rockefelleris. Go Mari lea geargan, de mun ja ISÁK joavku galgat leat DJ:t idjii. Nu ahte de ávžžuhan buot sápmelaččaid Oslos boahtit Rockefellerii dánsut!
Silje Karine Muotka
– Mus lea sárdni Romssas man galggan doallat Sámi álbmotbeaivvi. Sávan ahte ollen ruoktot Áltái eahketbeaivvi. Jus dan nagodan, de lean duhtavaš! Lean maid gorron ođđa gávtti nuoramus bárdnásan.
Iŋga Káre Márjá Utsi
– In leat vuos helt gávnnahan maid áiggun bargat, muhto jurdda lea biđđit mielohppiide ja oahpaheddjiide, muhto mus lea hástalus biergguin, go Barcelonas dieđusge ii gávdno bohccobiergu. Nu ahte ferten geahččalit gávdnat sarvvábierggu. Mus lea gákti mielde nu ahte lean goit dainna čiŋadeame.
Lill Mari Kiil
– Ávvudan Sámi álbmotbeaivvi vuohččan barggus boarrásiidruovttus Hársttáin, ja lea vuosttaš geardi go sii meinejit ávvudit dán beaivvi. Šaddá somá!
Sara Katrine Aleksandersen
– Sámi álbmotbeaivvi meinešin ealu luhtte fitnat ja maŋŋelgaskabeaivvi dollet jahkásaš meassuide Johkamohkkái.