Nu logai Sølvi Monsen go ollii mollii Álttá gávpotguovddážii otná iđit. Son ii lean vuordán beassat logi buoremusa searvái FL-500 luohkás.
Odne iđit boahtigohte FL-500 gilvaleaddjit mollii, ja bohtet ain otná beaivvi ja eahkeda mielde.
Eatnašat sis vásihedje beaivvádaga ja fierttu daid maŋemus miillaid vel mollii.
Báittii gilvvu beaivvážiin
Áltálaš Sølvi Monsen lei okta sis gii iđitbeaivve ollii mollii.
Son lei nu ilus ahte oidnui guhkkin juo movt son moddjái.
Moadde gatnjala vel measta golggiidedje go manai rastá moallasárgá.
Dál lei viđát geardde searvamin Finnmarksløpet gilvui, eai ge lean nu stuora vuordámušat:
– Mus lei mihttu dán jagi čađahit FL-500, ja ollet mollii. Go gilvu álggii, ja go manai buorebut go ledjen doivon, de dusten sávvat beassat 20 buoremusa searvái. Manai vel buorebut, nu ahte bidjen mihtu 15 buoremusa searvái. Sihke mun ja beatnagat leat rahčan dan nagodit, ja lean hui hui duhtavaš logát sajiin, dadjá Monsen.
Govven: Inger Marita Bals
Beatnagat ain buori vuoimmis
Monsen ii čiegadan ahte lei rámis beatnagiiguin, ja dan barggus maid sii leat bargan.
Son njávkkadii buot beatnagiid ja attii sidjiide guoli, ovdal go su veahkki doalvvui beatnagiid šibitdoaktára lusa.
– Lean nu ilus go beatnagat maid leat dearvan moalas, dadjá son.
Oahppan bártnis
45-jahkásaš Terje Erik Loftsgård lea golbma jagi juo čuvvon Finnmarksløpet, muhto ii leat ieš searvan.
Su bárdni liikogođii beatnagiidda ja beanavuodjimii moadde jagi dás ovdal, ja nu hal dat lei ge dahkkon.
Golbma jagi lea bártnistis čuvvon gilvvuin, dán jagi lei ieš mielde vuosttaš geardde.
Danne šattai ge maid dán jagáš rookie, mii mearkkaša easkkaálgi.
Govven: Inger Marita Bals
