Odne almmuhii Sámi Musihkkafestivála 2016 Sámi Grand Prix lávlunoasi finalisttaid. Dál čájehuvvo ahte okta finálalávlagiin lea juo almmuhuvvon, iige soaitte beassat mielde finálii.
Lea Guovdageainnu lagas radio mii odne muitala ahte lávlla mainna Irdon joavku lea beassan mielde Sámi Grand Prix 2016 finálii lea juo almmuhuvvon. Lávlaga namma lea «Nástealmmi vuolde» ja dat lea skearrus maid Irdon joavku almmuhii guovvamánu dán jagi.
– Boastut ipmirdan
SMF buvttadeaddji Nils Johan Vars lohká Guovdageainnu lagasradioi ahte son lea hupman Irdon joavkku Oula Guttormain ja orro leame ahte sii leat boastut ipmirdan njuolggadusaid.
– Oula Guttorm čilgii ahte sii jáhkke ahte lávlla ii galgga almmuhuvvon ovdal go sáddejit dan sisa gilvui, lohká Nils Johan Vars. Vars deattuha ahte Irdon joavku ii leat dan dihtomielalaččat dahkan, muhto leat boastut ipmirdan njuolggadusaid. Lávlla galgá leat sáddejuvvon SMFi ovdal go Irdon skearru almmuhuvvui.
Mearridit odne
Nils Johan Vars ii duostta vuos dadjat diskvalifiserejuvvo go Irdon joavku.
Son lohká GLRi ahte sin njuolggadusaid mielde eai galgga lávlagat mat leat mielde finálas almmuhuvvon ovdal finála, muhto in áiggo dadjat maidege vuos ovdal go go Sámi Musihkkafestiválas leat digaštallan dan.
SMF áigu ihttin almmuhit iežaset mearrádusa.
