Personbiilla vuoddji lea duššan johtolatlihkohisvuođas go lea vuodján oktii Norgga suodjalusa soahtevovnnain Snoasas, Davvi-Trøndelágas, odne.
Personbiilla vuoddji lea duššan johtolatlihkohisvuođas go lea vuodján oktii Norgga suodjalusa soahtevovnnain Snoasas, Davvi-Trøndelágas, odne.
Dan dieđiha NTB ođasdoaimmahat. Lihkohisvuohta dáhpáhuvai odne, mánnodatiđida, sullii diibmu 9:45 fylkkaluottas 763. 22 kilomehtera lulábealde Snoasa. Politiijat duođaštit NTB:i ahte okta olmmoš lea duššan.
– Lea leamaš johtolatlihkohisvuohta gaskal personbiilla ja Norgga panserbiilla. Ii okta ge suodjalusa olbmuin leat duođalaččat roasmmehuvvan, muitala Norgga suodjalusa oberstløytnanta Aleksander Jankov NTB ođasdoaimmahahkii.
Mielde soahtehárjehallamis
NRK ođđasiidda duođašta suodjalus ahte soahtevovdna dahje dárogillii «stridsvogn» gullá Norgga suodjalusa Davvi Brigáda ossodahkii, ja dat bealtabiila lei mielde soahtehárjehallamis Cold Response mii lea dál Trøndelágas. Soahtebiillas ledje guokte olbmo geat eaba leat fysalaččat roasmmehuvvan, muhto lihkohisvuohta lea muđui čuohcan sudnuide garrasit.
Dan hárjehallamis leat mielde 15 000 olbmo 14 riikkas ja bistá njukčamánu 22. beaivvi rádjái.
– Mii lea ain iskamin mii lea geavvan. Politiijain lea ovddasvástádus jođihit barggu lihkohisvuođabáikkis, ja Suodjalus lea veahkkin báikkis, muitala Jankov NTB:i.
Dutkame
NRK ođđasiin muitalii badjelaš diibmu 12:s politiijaid lihkohisvuođabáikki jođiheaddji, Eirik Johannesen, ahte politiija, militearapolitiijat ja Stáda geaidnodoaimmahat leat ain báikkis dutkame ášši.
