Riddu Riđđu lea ohcagoahtán dán jagi nuorra dáiddára. Festiválajođiheaddji hástala 25.000 ruvdnosaš stipeanddain ja fuomášumiin mas lea ávki dáiddalaš ovdáneapmái.
«Dán jagi nuorra dáiddár» leamaš guovddážis álgoálbmotfestiválas 1990-logu loahpa rájes, muhto dán jagi viiddidit doaimma stipeanddain. Ovttasráđiid Davvi-Norgga Seastinbáŋkku kulturealáhusvuođđudusain juohká Riddu Riđđu 25.000 ruvdnosaš stipeandda muhtin nuorra sámi dáiddárii gean čalmmustahttet festiválas mii lágiduvvo Olmmáivákkis, Gáivuonas, suoidnemánu 8. – 12. beaivái.
Stuora vejolašvuođat
Nuorra gii válljejuvvo čájeha čehppodagas muhtin dáiddalaš suorggis, son sáhttá ovdamearkkadihti leat diktačálli, govvadáiddár, filbmabargi, hábmejeaddji, dánsejeaddji dahje lávlu.
– Dávjá dáhpáhuvvá ahte Riddu Riđu nuorra dáiddár fuomášuvvo min lávddis, ja soames dáidá vásihan ahte oasálastin lea addán sutnje ođđa dáiddalaš vejolašvuođaid. Vuoitis lea erenomáš buorre vejolašvuohta čájehit čehppodagas iešguđetlágan gehččiide. Dasa lassin lea nuorra dáiddáris sierra prográmmaoassi festiválas ja son beassá olles jagi oasálastit sihke našunála ja internašunála lágidemiin, dadjá festiválahoavda Karoline Trollvik preassadieđáhusas.
Internašunála potentiála
Riddu Riđu ovttasbargu Davvi-Norgga Seastinbáŋkku kulturealáhusvuođđudusain nanne doaimma. Kulturealáhusvuođđudus searvá doibmii go sin mielas lea prošeakta miellagiddevaš.
– Mii jáhkkit sámi kultuvrras internašunála potentiála, ja danin lea midjiide illu searvat doibmii mii ovddida nuorra dáiddárii, lohká kulturealáhusvuođđudusa Bjørn Eirik Olsen.
Sávvet oallugiid ohcat
Nuorat galget ieža ohcat beassat «Dán jagi nuorra dáiddárin», son galgá leat gaskal 18-25 jagi boaris ja barggustis galgá deattuhit sámevuođa.
– Mii diehtit ahte Sámis leat olu nuorra dáiddačeahpit, ja mii sávvat oallugat ohcet, lohká Trollvik ja geažuha ahte ohcanáigemearri lea miessemánu 1. beaivvi.
Mannan jagi lea Riddu Riđđu čalmmustahttán nuorra mátta-sámi juoigi Marja Helena Fjellheim Mortensson.
