Festiválastivra lea mearridan ahte eai sáhte šat priváhta ruđaiguin joatkit lágidit festivála.
Logi jagi lea geassefestivála Dansklacken på dosan lágiduvvon Gárasavvonis, muhto dál lea stivra dieđihan ahte eai boađe lágidit dán festivála šat.
Festiválalágideaddji lohká šállošahttin ahte ná šaddá go festivála lea bivnnut leamaš ja lea geasuhan sihke báikkálaš olbmuid, olbmuid geain gullevašvuohta Gárasavvonii ja eará guovllu olbmuid maid.
– Lea váttis leamaš lágidit ja čađahit dákkár festivála go mii eat leat stuora ruhtadoarjagiid ožžon dasa. Girona gielda lea veahkehan, muhto muđui lea stivra ieš bidjan ruđa festiválii maid eat leat ožžon šat ruovttoluotta. Eat mii sáhte priváhta ruhtadit dákkár stuora festivála, dadjá festivála álggaheaddji Patrik Tuoremaa NSD:i.
