Politiijat navdet ahte Stian Hole lea láhppon meahccái.
Nordlándda politiijaguovlu oaččui dieđu láhppon olbmo birra geassemánu 9. beaivvi. Ohcanakšuvdna álggahuvvui dakkaviđe ja bisttii moadde beaivvi ovdal go geassemánu 13. beaivvi mearriduvvui ahte váldet bottu ohcamis dassážii go isket cavgilemiid ja eará guorahallamiid mat sáhtaše čoavdit ášši.
– Politiijat čađahedje plánejuvvon ohcamiid fas geassemánu 16. beaivvi, muhto dađi bahábut ii leat dievdu vel gávdnon, muitala Nordlándda politiijaadvokáhtta Torje Imøy Ávvirii.
Viđátlotjahkásaš Stian Hole dat lea jávkan Hápmiris. Su leat maŋimuš oaidnán Stuorgiettes, Hápmira suohkanis, geassemánu 7. beaivvi birrasii diibmu 12.00.
Politiijat muitalit ahte Hole lea šođbat ja sullii 180 cm guhkki.
Iskan cavgilemiid
Ovttas láhppon dievddu bearrašiin almmuhedje politiijat dievddu nama ja gova mannan vahkkoloahpa. Nordlándda politiijaguovlu bivddii maid olbmuid cavgilemiid áššis.
– Politiijat leat ožžon muhtin cavgilemiid áššis ja leat iskan daid, muhto eai dat ge leat buktán makkár ge bohtosiid, lohká Imøy.
Nordlándda politiijaadvokáhtta dadjá ahte eai pláne čađahit ođđa ohcamiid justa dál.
– Politiijaid váldoteoriija lea ahte dievdu lea láhppon meahccái, loahpaha son.
Jus dus leat cavgileamit Stian Hole jávkama birra, de ávžžuhuvvot váldit oktavuođa politiijaiguin dán telefonnummiris: 02800.
