Odne deaivvada sámediggepresideanta Silje Karine Muotka oljo- ja energiijaministariin Terje Aaslandain. Son ii jáhke makkárge čovdosa boađi boađi go beliin ii leat oba seamma ipmárdus ge áššái. – Eai leat bivdán ándagassii, eaige vuige ahte lea sáhka olmmošvuoigatvuođa rihkkumis. Ja dan imaštan.
Nu logai sámediggepresideanta Silje Karine Muotka otná preassakonfereanssas.
Dáčča álbmogii dáhtui presideanta čilget ahte vaikko vel Storheia ja Roan guovllus njeaiddáše ge bieggaturbiinnaid, de ain báhcet guvlui bieggaturbiinnat.
– Oktiibuot čieža bieggafápmoindustriija leat guovllus, muhto justa dán guovtti guovllus dat leat váttisvuođat. Dat leat huksejuvvon guovdu dálveeatnamiid. Boazu, nu go buot eará eallit, dárbbašit biepmu, muhto nu go diehtit, de daid deháleamos guohtuneatnamiin leat bieggaturbiinnat dál, čilgii son.
Deaivvada ministariin
Odne diibmu 15 deaivvada son oljo- ja energiijaministariin Terje Aaslandain. Čoahkkin lei plánejuvvon ovdal akšuvnnaid ja lea oassin Sámedikki konsultašuvnnain.
Filbma: Ánne Biret Anti
– Dilli šaddá vearrát ahte vearrát ja ovdal go sáhttit albmaláhkai hállagoahtit, de fertejit moadde ášši sajis. Mis lea olu mii ferte čielggaduvvot ja mun jáhkán mii fertet vuosttamužžan joavdat dasa ahte muhtin bivdá ándagassii stáhta bealis go leat guhkes áiggi čađa bargan boasttu láhkai. Nubbi lea ahte mis ferte okta ja seamma jurdda mii lea dat váldováttisvuohta, namalassii ahte lea olmmošvuoigatvuođarihkkumis sáhka. Ii oktage leat stáda bealis vel dan dadjan. Movt mii de galgat soabadit go eat leat ovttaoaivilis? jearrá Muotka.
30 čielggadeami dáhkkon
Aasland lea deattuhan ja geardduhan ahte ferte čohkket eambbo dieđuid áššis ovdal go sáhttet ođđa mearrádusaid áššis dahkat. Muotka ii áibbas ipmir dan go dássážii leat juo 30 čielggadeami dahkkon ja Alimusrievtti duopmu lea máŋgga daid čielggademiid vuođul dahkkon.
– Min mielas lea stáhta dáhttume fas guorahallat diekkáriid maid Alimusriekti lea juo čielggadan. Manne sii galget dan seamma fas guorahallat? jearrá son.
Hirpmahuvvan go ii bivdde ándagassii
Muotka lohká leat ollu čorgenbarggu ovdal go sáhttet albmaláhkai hállagoahtit. Son vuordá ahte dán čoahkkimis nagodeaba árvvoštallat movt dilli lea dál ja ahte jerrojuvvo ándagassii.
– Lea hirpmástuhtti go dássážii eai leat bivdán ándagassii eaige vuige ahte rihkkot olmmošvuoigatvuođaid. Dat čájeha ahte mis ii leat seamma oaivil mii dat váttisvuohta lea.
Odne leat demonstrašuvnnat sturron sakka ja oktiibuot 10 departemeantta leat sámenuorat ja sin veahkit gidden. Greta Thunberg lea ain dáppe ja dál lea maiddái Greenpeace veahkkin. Politiijat leat odne dolvon máŋga aktionistta giddagassii.
