Odne álgá diggeášši albmá vuostá guhte navdo leat báhčán bohcco dávgebissui Idres geasset.
Odne álgá diggeášši albmá vuostá guhte navdo leat báhčán bohcco dávgebissui Idres geasset.
Borgemánu loahpas gávdnui báhččon boazu Idres, ja jođánit čájehuvvui ahte boazu lea báhččon dávgebissuin. Seamma eahkeda váldui muhtin viđátlot-jahkásaš almmái politiijaide ja sivahallui elliidbiinnideamis ja suoládeamis, čállá oddasat.se.
Almmái álggos biehttalii leat dahkan dán, muhto mieđihii mánu maŋŋil ahte bohccot leat máŋggaid jagiid muosehuhttán albmá ja bilistan albmá opmodagaid, nu logai iežas heađis dahkan dán.
Loga maid: Dávgebissuin bážii bohcco
Dát ášši dattege lea eanemusat boktán dovdduid Idre čearus, danne go almmái lea áššáskuhtton billisteami ovddas ja go galgá leat gielistan alddis leat almmolaš ámmáha.
Maŋit oassi áššáskuhttimis boahtá das go almmái galgá dalle go gávnnahalai, ovdal go politiijat jovde báikái, leat lohkan muhtin vihtanii ahte son lea ovddeš politiija. Dán gal biehttala almmái.
SVT Sámeradio lea gieskat raporteren ahte badjel bealli Ruoŧa čearuin leat vásihan boazosuolavuođa maŋimuš jagiid.
SSR, Ruoŧa Sámiid Riikkasearvi, háliida dákkár rihkkosiidda garrasat ráŋggáštusaid, go dákkár áššiin hárve áššáskuhttojit ja dubmehallojit vearredahkkit.
