Fylkkamánni lea bivdán Kárášjoga gieldda dárkileappot geahčadit mánáidgárddi gos mánát galget doaruhuvvon.
Fylkkamánni lea bivdán Kárášjoga gieldda dárkileappot geahčadit mánáidgárddi gos mánát galget doaruhuvvon.
Skábmamánus čáliimet Ávviris dan birra go muhtun mánáidgárddis Kárášjogas vásihit mánát ahte doaruhuvvojit eará mánnái.
Finnmárkku Fylkkamánni lei ožžon váidagiid váhnemiin, ja bivddii mánáidgárdeeiseválddi Kárášjoga gieldda mánáidgárdeeiseválddi bidjat johtui bearráigeahču muhtun mánáidgárddis jođánepmosit, go leat ožžon dieđuid doaruhemiid ja givssidemiid birra.
Gielda galggai ovdal bearjadaga juovlamánu 2. beaivvi dieđihit Fylkkamánnái ášši árvvoštallamiid ja bohtosa. Kárášjoga gieldda bajásšaddanossodaga jođiheaddji, Arnulf Soleng, muitala Ávvirii ahte dan sii dahke. Maŋŋil dan lea Finnmárkku Fylkkamánni dáhtton dábálaš vuogi mielde árvvoštallama.
Ođđasit bearráigeahčču
Kárášjoga gielddas lea dál ođđa áigemearri, guovvamánu radjái galgá gielda čađahit geahču dan manaidgárddis.
– Lean dieđihan mánáidgárdái ahte boahtá bearráigeahčču ja besset ráhkkanit dasa, lohká Soleng.
Soleng ii loga diehtit makkár dilli lea mánáidgárddis juste dál.
– In leat fitnan dáid beivviid doppe, lohká son.
– Mii leat bidjan liigeolbmo veahkkin mánáidgárdái. Mánáidgárddis lohket ahte lea ávki. In dieđe lea go šat givssideapmi, ii leat gullon šat mihkke. Váhnemat han gal dieđihit jus lea mihkke, lohká Soleng go Ávvira journalista jearrá makkár doaimmat leat biddjon johtui eastadit givssideami.
Vuđoleappot čilget
Liv Hanne Huru, Finnmárkku Fylkkamánnis, čilge ahte sii leat bivdán Kárášjoga gieldda dárkileappot geahčadit dili mánáidgárddis go dat lea gieldda bargu. Juovlamánu 2. beaivvi gielda attii čilgehusa Fylkkamánnái mas čilgejedje makkár doaimmat mánáidgárddis leat biddjon johtui.
– Mii leat ain bivdán gieldda bearráigeahččat mánáidgárddi. Buot suohkanat leat báikkálaš mánáidgárdeeiseválddit, ja sin bargu lea bearráigeahččat ja dárkkistit ahte lágat čuvvojit. Sihke mii ja Kárášjoga gielda leat ožžon váidagiid váhnemiin, ja dat leat dan mađe duođalaččat. Danne mii leat bivdán Kárášjoga gieldda váldit ášši duođas, ja gávnnahit mii lea duogáš áššái.
Son čilge ahte Fylkkamánni lea ožžon čilgehusa makkár doaimmat mánáidgárddis leat biddjon johtui, muhto eai makkár doaimmat leat biddjon johtui dán áššis. Dan sii váillahedje, ja danne leat bivdán eambbo guorahallamiid ja bearráigeahču. Huru čilge ahte gielddain lea duppál-rolla mánáidgárdeáššiin, go sii leat sihke eaiggádat ja eiseválddit.
– Dalle sáhttet rollat seaguhuvvot. Min mihttu lea ahte mánáin galgá oadjebas dilli mánáidgárddis. Go mánáidgárdeeiseválddit eai bargga dan maid galget bargat, de fertet mii sin gohččut dan bargat, vai mánáin šaddá dakkár dilli go galgá sis. Dál mii vuordit guovvamánu lohppii, de beassat oaidnit maid gielda lea gávnnahan, lohká Huru.
