Ođđa bálvalus sáhttá transkriberet 61 gillii.
Dál sáhttet Norgga árktalaš universitehta (UiT) bargit ja studeanttat transkriberet jietnaávdnasiid 61 gillii. Bálvalusas lea unnán meattáhusat ja sáhttá maid gieđahallat čiegus dieđuid.
Prográmmagálvu lea ráhkaduvvon goanstajierpmi vuođul ja dan sáhttet UiT bargit ja studeanttat viežžat Klartekst neahttasiiddus.
Steinar Trædal-Henden, guoskevaš bálvalusaid ossodaga dutkama ja gaskkusteami fágajoavkojođiheaddji, oaivvilda ahte ođđa bálvalus sáhttá leat ávkin eanet geavaheaddjejoavkkuide.
– Bálvalus seasttášii hui ollu áiggi ja ruđaid. Klartekst sáhttá transkriberet mihá jođáneappot go maid olmmoš nagoda, lohká son.
Trædal-Henden oaivvilda vejolažžan boahtteáiggis ásahit transkriberenčovdosa maiddái sámegielaide, muhto dalle ferte vuos ovddidit modealla mas goanstajierbmi hárjehallá.
Rukses dieđut
UiT ođđa vuogádat lea dohkkehuvvon nu gohčoduvvon rukses (suollemas) dieđuide, danin go dat ii juogat dieđuid makkárge goalmmát osolažžii. Dat mearkkaša ahte vuogádat sáhttá adnot sensitiiva jearahallamiid ja eará sullasaš materiála transkriberemii, dieđiha UIT preassadieđus iežaset neahttasiiddus.
