Áibbas ođđa podcasta galgá oahpahit joatkkaskuvlaohppiid vearu, čálggu ja bargoeallima birra.
Bargoeallima váldoorganisašuvnnat ja Vearroetáhtta leat bidjan johtui áibbas ođđa podcasta, mas leat ulbmiljoavkun joatkkaskuvlla oahppit.
«Spleiselaget Podkast» lea podcasta mas juohke oassi bistá 20 minuhta. Nuorat ohppet vearu, bargoeallima, demokratiija ja čálggu birra, álkes ja somás vuogi mielde. Podcasta lea lassin vel oahpahusas mii lea jo skuvllain.
– «Spleiselaget» lea nuvttá fálaldat maid beassá geavahit oahpahussii joatkkaskuvllain. Dál viiddidit fálaldaga vel podcastain, muitala Vearroetáhta divišuvdnadirektevra ja SMSØ (Samarbeid mot svart økonomi) jođiheaddji Marta Johanne Gjengedal preassadieđáhusas.
Servvodatberošteaddjit
Njealji vuosttaš oasis beassá oahppat makkár demokráhtalaš hástalusat leat, robotiserema, erohusaid Norgga ja Amerihká dearvvašvuođaguovddážiin ja manne mii máksit vearuid.
– Mihttu lea geavahit áigeguovdilis fáttáid, ja geavahit somás ja informatiiva vugiid, mii dagaha ahte oahppit digaštallet fáttáid maŋŋel. Guhkit áigge mihttu lea dagahit eambbo beroštumi min servodahkii, čilge Gjengedal.
Podcasta gávdná iešguđetge rávdnjenfierpmádagain, ja Spleiselaget.no neahttasiiddus.
