Eanet olbmot go goassege ovdal gallededje Johkamohki márkaniid guovvamánu álgogeažis. – Leat leamaš hui buorit márkanat ja ođđa olahus, dadjá márkangenerála Birgitta Nilsson.
Dan jagi ledje 51670 olbmo Johkamohki márkaniin, dat lea eanet go goassege ovdal. Ovddit olahus lei 2007 go dalle ledje 49 726 galledeaddji Johkamohkis.
– Mii leat hirbmat ilus go Johkamohki márkanat geasuhit nu olu olbmuid maŋŋel 415 jagi. Leat leamas hui buorit márkanat ja ođđa olahus ja buot márkanbargit leat hui rámis maŋŋel dan dieđu.
Johkamohki márkangenerála Birgitta Nilsson dadjá ahte turismaealáhus lea deaŧalaš Johkamohkkái. Olusat háliidit vásihit Johkamohki márkaniid go lea nu dovddus ja dat geasuha olbmuid miehtá máilmmi. Dat lea vuoitun olusiidda ja maid eará báikkiide Davvi-Ruoŧa guovlluin.
– Dal mii leat guođđán 2020 márkaniid ja álgán ráhkkanit boahtte jagi márkaniidda mat lágiduvvojit 4-6/2 2021, dadjá Nilsson.
