Guovvamánu 2024 rájes fállá Sámi allaskuvla davvisámegiela álgokurssa Girkonjárggas. Oahppu lea ožžon inspirašuvnna Sámi allaskuvllas lihkostuvvan oahppomálles mii juo gávdno, ja mii fállojuvvo Guovdageainnus.
Lea Máhttodepartemeanta mii lea diŋgon oasseáiggi oahpu maid Sámi allaskuvla álggaha. Geassemánus oaččui allaskuvla 6 miljovnna ruvnno oassin áŋgiruššamii Nuorta-Finnmárkkus áigodahkii 2023–2026.
– Min ulbmil lea fállat eanet oahpposajiid sámegiela álgokurssaide, mii lea mearrideaddjin dasa ahte eanebut galget oažžut vejolašvuođa oahppat sámegiela. Mis leat juo vuordinlisttut Guovdageainnu álgokursii, ja vejolašvuohta fállat álgokurssa Girkonjárggas lea hui dehálaš go galgat nagodit dustet sámi servodaga máhttodárbbuid, dadjá Sámi allaskuvlla rektor Liv Inger Somby.
Oahppu lea 15 oahppočuoggás ja bistá ovtta lohkanbaji. Dát oahppu lea jurddašuvvon sidjiide geat eai máhte hállat eaige čállit davvisámegiela, muhto háliidit oahppat giela.
