Meteorologisk instituhtta lea rahpan ođđa dálkerádára Finnmárkui.
Dálkerádár addá Finnmárkku ássiide vejolašvuođa jođánit ráhkkanit dálkkiide, ja rádáriin buoridit stuora váilevašvuođa mii lea leamaš dálkedieđiheamis.
Dálkerádár sádde dieđuid dađistaga yr.no dálkedieđáhussiidui ja dieđáhusaid makkár dálki šaddá lagamus 90 minuhta. Bearalvágis ja Ákŋoluovttas leat jo rádárat, ja go dál rahpasii vel goalmmát de nagodit dieđihit buorimuddui Finnmárkku dálkki. Goalmmát dálkerádar lea Rássegálváris, Guovdageainnus.
Rássegálvári dálkerádár gokčá 240 kilomehtera. Olbmot Rássegálvári birrasis ožžot maid dál yr.no ođđaseamos dálkedieđáhusaid.
Dálkerádár lea dehálaš dálkedieđiheapmái davvi guovlluin, ja erenomážit dakkár guovlluin gos sáhttet olu dálkkit. Rádár lea maid veahkkin gádjunbargguin ja girdijohtolahkii. Seammás addá dat Norgga čázádat- ja enerigiijadirektoráhttii (NVE) buori vuođu go lea muohtauđasvára birra sáhka.
Guhkit áigge badjel sáhttá dálkerádár muitalit dálkkádatrievdademiid birra Davvi-Norggas.
– Šaddet eambbo ja garraset njuoskka dálkkit. Dat go Finnmárkkuduoddaris lea rádár lea veahkkin midjiide oaidnit mo dálkkádat rievdá sihke mearragáttiin ja siseatnamiin, muitala Meteorologisk instituhtta dálkkádatdutki Han Olav Hygen NTB:i.
