Lea vuosttaš geardde go olles biibbal almmuhuvvo dan davvisámegiel čállinvuohkái mii dál lea geavahusas.
– Dat lea olahus, lohká Sámi Girkoráđi jođiheaddji.
Det Norske Bibelselskap stivra lea dál dohkkehan ođđa jorgaleami.
Sámi Girkoráđi jođiheaddji, Sara Ellen Anne Eira lohká Risttalaš preassakantuvrii (KPK) ahte sii diehttelasat atnet dan olahussan go olles biibbal dál lea jorgaluvvon davvisámegiela dála čállinvuohkái.
120 jagi boares jorgaleapmi
Ovddit davvisámegiel biibbaljorgalus dahkkui 1895:s, ja lea čállojuvvon čállinvuohkái mii rievddada olu dála davvisámegielas.
– Leat oallugat geat eai šat hálddaš ovddit čállinvuogi. Leat maid muhtun oasit dála jorgaleamis maid eai buohkat oba ipmir ge, ja leat šaddat dorvvastit eará gielaide vai ipmirdit buot cealkagiid sisdoalu. Dat oasit leat dál divvojuvvon. Danne ii leat dát ođđa jorgaleapmi dušše ráinnas jorgaleapmi, muhto das lea maid giella ođastuvvon nu ahte lea ipmirdahtti midjiide geat dál eallit, čilge Sara Ellen Anne Eira KPK:ii
– Kulturguoddi
– Biibbal ii leat dušše risttalaš girji, muhto maiddái dehálaš kulturguoddi servodagas mii lea vuođđuduvvon risttalaš árvvuid ala. Danne lea mávssolaš ahte dehálaš čállagat maid gávdnojit davvisámegillii, lohká Eira.
Sávvá boktit beroštupmi Sátnái
Maiddái Bibelselskapet ođđa generálačálli, Paul Erik Wirgenes, govvida ođđa jorgaleami olahussan.
– Lea varra dat stuorámus davvisámegiel giellaprošeakta mii lea čađahuvvon maŋemus čuođi jagis, ja mii sávvat ođđa Biibbal buktá ođđa ipmárdusa ja beroštumi Sátnái, lohká Wigernes preassadieđáhusas.
