Sámediggeráđđi lea juolludan doarjaga Berit Miennai ásahit duodjeossodaga Mázii.
Berit Mienna fitnodat lea dál Unjárgga gielddas, gos son buvttada ullokartáŋggaid gápmagiidda ja skuovaide siskkošvuođuid suoinnis, beassis ja ullus.
Dálá buvttadanvisti lea unni, ja son áigu dál ásahit sierra duodjeviesu Mázii gos duddjo. Máze lea Berit Mienna ruovttubáiki, ja son áigu ain buvttadit dujiid duhppejuvvon ullus.
Sámediggeráđđi lea juolludan 356 000 ruvdnosaš doarjaga fitnodahkii hukset duodjeviesu.
– Sámediggeráđđi doarju duodjefitnodagaid ásaheami, ja mii sávvat ođđa ásahussii buresboahtima Mázii, dadjá ráđđelahttu Hans Ole Eira (Gb). Bargosajit leat hui dehálaččat Máze ovdáneapmái, ja gilis leat guhkit áiggi leamaš hástalusat go olbmot fárrejit eret Mázes, loahpaha Eira.
Duoji ealáhusšiehtadusas Sámedikki 2020 bušeahtas lea várrejuvvon 1,5 miljovnna ohcanvuđot doarjjan investeremiidda, ovddidandoaibmabijuide, konsuleantaveahkkái, álggahandoibmii ja prošeavttaide.
