Vaikko leat eanas nuorat johtolatlihkohisvuođain de 60 proseantta goitge eai duostta muitalit jus eai leat oadjebasat muhtuma fárus gii lea iežaset agis. Dan čájehit logut Tryg Forsikring jearahallaniskkadeamis.
– Earenoamážit eahkes vahkkoloahpaid de diehtit ahte olu nuorra vuoddjit girddihit eambbo go lea lohpi. Sii dolvot dávjá iežaset ahkásaččaid ruoktot maŋŋel feasttaid. Mii oaidnit iskkadeamis ahte eambbo go guovttis golbmasis ballet dahje eai leat oadjebasat dakkár dilálašvuođain, ja eatnasat leat nieiddat, dadjá Tryg Forsikring jođiheaddji, Espen Opedal preassadieđáhusas.
«Bággu» čuovvolit earáid
Maŋemus jagiid leat 693 olbmo duššan johtolagas Norgga luottain, ja máŋga duháha fas roasmmehuvvan. Borgemánu 1. beaivvi rádjái leat 58 olbmo duššan dán jagi. Iskkadeamis boahtá maid ovdán ahte lagabui 60 proseantta eai leat goasse geahččalan biehttalit čohkkedit biilii vaikko eai leat leamaš oadjebasat.
– Čájehuvvo ahte dan maid eatnasat dahket, fertejit buohkat dahkat, ovdamearkka dihte čohkkedit biilii masa eai áiggošii go eai dovdda iežaset oadjebassan. Vaikko eai dovdan iežaset oadjebassan, de vástida okta golmma olbmos ahte lea čohkkedan biilii go earát dahket dan, dadjá son.
Olu badjel bealli dain geat leat duššan johtolagas diibmá ledje biilavuoddjit dahje mielčuovvut. Iskkadeamis vástidit guovttis golbmasis ahte leat vásihan iežaset ahkásaččaid nu girddiheamen ahte leat leamaš balus.
– Eai livčče soaitit ná olu lihkohisvuođat jur livčče vuodjit várrogasat. Vai sihkarvuohta johtolagas galggašii buorránit, fertešeimmet oažžut nuoraid ipmirdit man váralaš sáhttá leat girddihit, dadjá Opedal.
