70 proseantta romsalaččain ja finnmárkulaččain oaivvildit ahte russaáiggis juhket menddo olu alkohola.
Dán jagi russaáiggis leamaš olu digaštallamat gárrenmirkkogeavaheami birra.
Av-og-til -organisašuvdna lea čađahan guorahallama mii čájeha ahte Romssa ja Finnmárkku fylkkas oaivvildit čiežas lohkásis ahte russat juhket menddo olu.
– Alkohola lea dat gárrenmirkko maid eatnašat válljejit ja mii lea oassin eatnašiid russaáiggis. Danin ferte alkoholakultuvra oassin russaáiggi digaštallamis, lohká Av-og-til váldočálli Ragnhild Kaski preassadieđáhusas.
Váikkuhusat
Mediat leat maŋimuš vahkkuid čállán russaid birra geat juhket govaid lobihemet ja geahččaladdet ođđa gárrenmirkkuid. Kaski oaivvilda ahte alkohola lea mielde váikkuheamen russaid dillái.
– Menddo olu alkohola dagaha ahte lea stuorát riska vásihit dahje čađahit veahkaválddi, seksuálalaš illasteami, lobihis govvajuohkima dahje geahččalit eará gárrenmirkkuid. Feasta ii šatta buoret vaikke juhká olu, šaddá baicce nuppi ládje, lohká son.
Dábálaš olbmuid lassin oaivvildit maiddái russat ahte russaáiggis lea menddo olu alkoholageavaheapmi. 47 proseantta diimmá russain vástidedje Respons Analyse guorahallamis ahte alkoholas lei leamaš menddo stuora sadji russaávvudeamis.
