Ii oktage dan golmma vuoitis lean boahtán Áltái vuostáiváldit Sami Music Awards bálkkašumiid, muhto giitaledje váimmolaččat videoid bokte.
Ii oktage dan golmma vuoitis lean boahtán Áltái vuostáiváldit Sami Music Awards bálkkašumiid, muhto giitaledje váimmolaččat videoid bokte.
Sii geat vuite historjjá vuosttaš Sami Music Awards 2016 leat:
Luovos luohkká- Sofia Jannok
Árbevirolaš luohti – Marja Helena Fjellheim Mortensson
Dán jagáš radiolávlla – Felgen Orkester -Buolli dolla
Bálkkašumiid juohkin lei dál bearjadaga diibmu čiežas eahkes njuolggosáddagis neahtas NRK Sámi bokte. Ii oktage vuoiti lean Álttás váldime vuostá bálkkašumiid, muhto bukte dearvuođaid ja giitaledje báddejuvvon videoin TV-šearpmas.
Sámi Musihkkavahku jođiheaddji Klemet Anders Buljo jugii vuosttaš bálkkašumi, luovos luohká. Dan vuittii ruoŧabeale artista Sofia Jannok.
– Sus lea juo riikkaidgaskasaš karriera, son seaguha popa, jazza ja luođi, dajai Buljo juogedettiin.
Sofia oažžu luhka, logi duhát ruvnno ja studioáiggi logi duhát ruvnno ovddas. Buljo muitalii ledje oktiibuot 15 nama geaid gaskkas jurie válljii Sofia Jannoka.
– Livččen duođas háliidan leat dieppe váldime vuostá, muhto lohpidan mun ávvudan albmaládje dáppe, dajai Sofia Jannok movttegit.
Lullisámi juoigái gudni
Inga Ravna Eira jugii ges árbevirolaš šáŋŋera vuoittu. Dan vuittii lullisámi juoigi Marja Helena Fjellheim Mortensson.
Eira logai iežas divtta “Áicen máttuid” mii aitto lea almmuhuvvon Čuollogeađgi skearrus.
– Marja Helena lea leamaš mielde oainnusin dahkame luođi guovllus gos luohti measta lea nohkan, dajai Eira lávddis.
Vuollegaš vuoiti
Marja Helena vuittii maiddái 10.000 ruvnno ja logi nuvttá diimmu Arctic Song Studios ja vel luhka. Son orui measta njuorraseame go giitalii.
– Mánnán jurddašin gos mu luohteárbevierru lea, ja dan mun ožžon viimmat go álgen bargat Frode Fjellheimain, ja giittán su go lea leamaš nu gierdevaš muinna. Munnje lei dehálaš gávdnat dan mii mis lea dáppe lulde, ja gávnnadit ja humadit olbmuiguin geat ain máhttet juoigat dáppe, dajai vuoiti.
Felgen lea Johkamohkis
Goalmmát vuoittu, “Dán jagáš Sámi radiošuoŋa”, jugii NRK-bargi Kolbjørn Norvang. Dan vuittii Felgen Orkester lávlaga ovddas mii lea čuojahuvvon measta 2000 gearddi Spotifys, namalassii “Buolli dolla”.
Sidjiide ii ge heiven boahtit Áltái vuostáiváldit vuoittu, go leat dán vahkkoloahpa čuojaheame Johkamohki márkaniin.
– Mii háliidit giitit buohkaid geat jienastedje ja maid buohkaid geat leat čuvvon min konsearttaid go álggiimet guokte golbma jagi áigi. Dát vuoitolávlla riegádii Nilut Cupas diibmá ja min fánssat leat mielde leamaš ráhkadeame dán. Bálkkašupmi movttiidahtte min vel eambbo dál go leat ráhkadeame nuppi skearru, dadje sii. Sidjiide lei seamma bálkkašupmi go dan guovtti eará vuoitái.
Dáin doaluin čuojahedje vel Arvvas, Ágy, Heaika Hætta ja Amoc
