Nuorain lea beroštupmi ođđasiid lohkat muhto dán áigge eai geasut šat báberáviissat. Sosiála mediat ja Snapchat leat kanálat gos nuorat gaskal 9-18 jagi lohket ođđasiid.
Guorahallan, Mánát ja Media 2020, maid Mediabearráigeahčču lea dahkan, čájeha ahte eanaš nuorat gaskal 9-18 jagi lohket eanemus ođđasiid sosiála mediaid bokte.
Guorahallamis boahtá ovdan ahte mánát ja nuorat beroštit ja háliidit gullat dahje oaidnit ođđasiid, muhto ahte dát dáhpáhuvvá digitála vuogádagain.
– Lea buorre ahte nuorain lea beroštupmi ođđasiid lohkat, muhto lea dehálaš ipmirdit ahte sosiála mediain sáhttet leat hástaleaddji bealit maiddái go galget doaibmat ođaskanálan, dadjá Mediabearráigeahču direktevra Mari Velsand preassadieđáhusas.
