Elle Majjen Utsi, gii lea fargga 4-jahkásaš, lei Riimmanjárggas oaggume go vuoitoguoli gottii. Lei unna sáiddáš mii dohppii vuggii.
Ávvir lágida mánáide «Guollelihkku» nammasaš oaggungilvvu olles geasi gitta borgemánu 13. beaivái. Dan oktavuođas vuorbádit ođđa oaggunstávrávuoiti juohke vahku. Elle Majjen vuittii mannan vahku stávrrá.
Elle Majjen muitala ahte lei somá goddit sáiddáža, ja eadni, May-Synnøve Utsi, lasiha vel ahte viellja šattai veahkkin giessat guoli gáddái dan sivas go Elle Majjenis lea doddjon giehta.
– Sus lea oainnat doddjon giehta, ja son ii sáhte ieš giessat ja doallat stákku oktanaga. Nu ahte stuoraviellja fertii doallat stákku ja son ges giessat, ja nu de barggaiga veahkkálaga.
Áigu fas oagguntuvrii vuolgit
Elle Majjen ja May-Synnøve muitaleaba ahte eaba leat šaddan fitnat oaggume maŋŋel go Elle Majjen gottii vuoitoguoli, muhto ahte dál beassaba vuolgit fas oaggut go lea ođđa oaggunstávra.
– Dál ean leat šaddan fitnat oaggume, muhto moai áigo gal fitnat. Dál besse fitnat oaggume ođđa stákkuin, muitala May-Synnøve.
– Man somá go vuiten stákku, dadjala Elle Majjen.
Elle Majjen muitala ahte son illuda oažžut ođđa oaggunstávrra, ja go dainna vuolgá oaggut de háliida goddit stuorra háia ja stuorra hávgga.
