Ollugat leat bisson ruovttuin dahje iežaset guovlluin. Dat mearkkaša ahte leamaš uhcit gádjumat go dábálaččat eaktodáhtolaš vehkiide, geat leamaš beassášgearggusvuođas dáid beassážiid.
Lávvardat čuovganeapmái fitne Norsk Folkehjelp, mii lea Tromssa eaktodáhtolaš gádjunveahka, veahkeheame guoktása geat leigga darvánan dálkki dihtii heahtebuvrái Kjølen nammasaš váris Sálliris. Soai dárbbašeigga veahki dádjadit vulos fas.
– Mii oaidnit olbmot leat čeahpit johtit guovlluin gos birgejit. Dattetge sáhttá lihkohisvuohta ja heajos dálki boahtit fáhkka. Mis leamaš danin moadde gádjunakšuvnna, muhto guhkkin eret nu olu go muđui láve beassášluomuin, lohká Norsk Folkehjelp Sanitet jođiheaddji Vegard Eidissen Lindbæk.
Dáid beassážiid ledje 26 ohcan- ja gádjunakšuvnna maidda Norsk Folkehjelp eaktodáhtolašveahkit serve. Olahusjagi 2018:s lei lohku 95. Eidissen Lindbæk lohká molsašuddi dálki lea čájehan man dehálaš lea bures ráhkkanit ovdal go dolle meahccái.
– Olbmot geat leat dárbbašan veahki, leat čehpet dieđihan ja leat birgen dassážii go veahkki joavddai. Muhtin dáhpáhusat livčče sáhtán šaddat duođalaččat, muhto leat birgen go leat jierpmálaččat láhtten, lohká Eidissen Lindbæk ja lohká Norsk Folkehjelp lea heivehan gearggusvuođa lagas birrasii.
