Lákkonjárggaorohaga albmát, Mikkel Andreas Eira, Per Johan Eira ja John Inge Eira, vuite visot maid sáhtte vuoitit diibmá Norggameašttir njoarostangilvvuin. Sii čájehedje gosa Norgga buoremus njoarosteaddjit gullet maŋŋá go faskejedje vuosttaš, nuppi ja goalmmát saji. Odne leaš oaidnit nagodit go dát golmmas suohpangieđa doallat seamma stargadit go diibmá.
Odne álget Norggameašttirgilvvut gávpotguovddážis Romssas. Odne leat vuos njoarostangilvvut ja ihttin, ieš Sámi álbmotbeaivvi, leat heargevuoddjingilvvut. Njoarostangilvui leat 21 almmáiolbmo ja 6 nissona dieđihuvvon. Diimmá vuoiti Mikkel Andreas Eira sávvá ahte sus lea seamma vuoitolihkku dán jagi, muhto ii duosta einnostit maidege go leat olu buorit suohpangieđat gilvvus mielde. Garraseamos gilvaleaddji liikká árvvoštallá diimmá goalmmát saji vuoiti John Inge Eira.
Nissonat
Diibmá vuittii nissoniid njoarostangilvvus guovdageaidnulaš Elle Martine Eira, nubbin bođii ges kárášjohkalaš Naja Kristine Fors, ja guovdageaidnulaš Marja Elise Hætta Eira goalmmádin. Dán golbmasis ii searvva dán jagáš Norggameašttir njoarostangilvvuide eará go Marja Elise Hætta, muhto son oažžu garra gilvvu jagi 2014 vuoitis Kirsti Monica Eiras. Son ii sáhttán diibmá searvat «rigguma» dihte.
Sotnabeaivvi leat ges Norggameašttirgilvvut heargevuodjimis. Gilvvus leat gávcci hearggi mielde mat leat:
Tsunami (Martin Buljo, Lákkonjárga)
Suiva (Ana Maria Eira, Máze Hearggit)
Ingrid Luostat (Ellen Ingrid Eira, Kárášjoga GH/SVL-N)
Hruberch (Lemet Aslat Eira, Kárášjoga GH/SVL-N)
GB Čuoivvat (Klemet Amund Eira, Kárášjoga GH/SVL-N)
Čuorggut (Aslak Anders Eira, Guovdageainnu HS/SVL-N)
Muzet (Bjørn Johansen, Máze Hearggit)
(Ole Mathis Eira,Guovdageainnu HS/SVL-N
Ovdamunni
Favorihttan lea einnostuvvon diimmá vuoiti Ingrid Luosttat ja Karasprintan vuoiti Suiva. Ingrid Luosttaga ovdamunni lea ahte lea hárjánan ruohttat gilvvuin gos leat ollu geahččit, ja seamma hárjáneapmi ii leat Suivas.
NM gilvvut Romssas leat lágiduvvon 12. geardde, ja lea Norgga Sámi Valáštallanlihtu (SVL-N) ovttas Midnightsun Maraton (MSM) mat lágidit gilvvuid.
