Maŋŋel go Ruošša fallehii Ukraina, de leat norgalaččat čoaggán ruđaid heađálaččaide ja skeŋken badjel 700 milljovnna ruvnnu eaktodáhtolaš organisašuvnnaid bokte.
Fundraising Norge lea kárten man olu norgalaččat leat čoaggán ruđaid Ukrainai maŋŋel go doppe buollái soahti guovvamánu loahpa geahčen.
Ruhtasubmi lea jo badjel 700 miljovnna ruvnnu, čállá Vårt land.
– Norgalaččain lea dáhttu veahkehit, oaivvilda Funfraising Norge váldočálli Siri Nodland.
Stuoramus ruhtačoaggin 2004 rájes
Rukses Ruossa lea čoaggán eanemus ruđaid soađi heađálaččaide. Dan rájes go Ruošša fallehii Ukraina guovvamánu 24. beaivvi, de leat priváhta olbmot ja ealáhusfitnodagat skeŋken 230 miljovnna ruvnnu Rukses Russii. Ná olu ruđaid eai leat čoaggán dan rájes go tsunamiija deaividii Thaieatnamis 2004:s, dalle čogge 400 miljovnna ruvnnu.
– Dat lea hirbmat erenomáš. Olbmot leat duođaš áŋgiruššan ja addigohte ruđaid seamma beaivvi go soahti buollái. Muhtimat leat jo moddii dorjon veahkkebarggu ja ealáhusaid bealis eat leat ovdal oaidnán dakkár áŋgirvuođa, lohká Norgga Rukses Ruossa márkanhoavda Nina Elisabeth Larsen.
Flyktninghjelpen lea čoaggán nubbin eanemus ruđaid Ukraina-veahkkedoaimmaide, dássážii leat ožžon 81,5 miljovnna ruvnnu. SOS-barnebyer lea čoaggán 77,5 miljovnna ruvnnu, Redd Barna 51,8 miljovnna ruvnnu ja Kirkens Nødhjelp 36 miljovnna ruvnnu.
