Guovvamánu 27. beaivvi rájes gitta njukčamánu 20. beaivái lea suodjalusjohtolat ja hárjehusat Finnmárkku geainnuid alde Nordic Responce 2024 oktavuođas.
10 000 Norgga ja eará guovlluid soalddáha hárjehallagohtet fylkka geainnuid alde. Stáhta geaidnodoaimmahat ja Finnmárkku fylkkasuohkan ávžžuhit biilavuddjiid leat áicilat.
– Mii ávžžuhit mátkkošteddjiid rehkenastit buori áiggi mátkkošteapmái vuordima dihtii, iskat ođđaseamos dieđuid ovdal go dollejit mátkái, dadjá doaibmi sekšuvdnahoavda Håvard Langmo Geaidnodoaimmahagas Davvi.
Dat guoská dáidda geainnuide:
E6 Langnes ja Álttá gaskka.
E6 Kvænangen ja Skáiddi gaskka.
E45 Álttá ja Suoma riikarájá vuostá (Eanodaga).
Rv. 92 geaidnoearus Kárášjoga guvlui E45.
Rv. 94 geaidnoearus Hámmerfeastta guvlui E6.
Fv. 8008 – Gargiageaidnu.
Galgá maid leat suodjalusjohtolat E6-geainnu alde Romssas, muhto eai hárjehallamat.
Suodjalusa ráidovuodjin Langnesas Áltái
Guovvamánu 27. beaivvi rájes lea Suodjalusa ráidovuodjin E6 geainnu alde Langnes ja Álttá gaskka. Danne leaktu unniduvvo dáppe.
Ovtta ráidovuodjimis leat 4 ja 12 suodjalusfievru. Ráidovuodjin merkejuvvo. Suodjalusa ráidovuodjima ii galgga ráfehuhttit.
Leage áicil hárjehusguovllus
Go váldohárjehallamat álget njukčamánu 3. beaivvi, de sáhttá namuhuvvon geainnuin leat johtolat ain gitta 15–20 minuvtta hávalis.
– Gaskkat galget merkejuvvot, ja Suodjaluspolitiijat leat dalle báikki alde gulahallan dihtii mátkkošteddjiiguin. Mii ávžžuhit earenoamážit leat áicilat daid gaskkain, dadjá Langmo.
Váldohárjehállamat loahpahuvvojit njukčamánu 14. beaivvi. Muhto Suodjalus lea oidnosis gitta njukčamánu 20. beaivái Finnmárkkus.
Čuovo johtolatdieđuid
Stáhta geaidnodoaimmahat ja Finnmárkku fylkkasuohkan ovttasbarget Suodjalusain ja eará siviila eiseválddiiguin hárjehallamiid oktavuođas.
– Mii ávžžuhit mátkkošteddjiid čuovvut johtolatdieđuid mat almmuhuvvojit Suodjalusa bokte ja eará eiseválddiid bokte. Dat lea earenomáš dehálaš nu dahkat dain guovlluin gos leat hárjehallamat, dadjá Finnmárkku fylkkasuohkana johtalushoavda Bjørg Anita Joki.
