-Almmuhus-
-Almmuhus-
OĐĐASAT Njuovvan­báza­husat ealihit bora­spiriid

Njuovvan­báza­husat ealihit bora­spiriid

-

-

Lierne gieldda áŋgiris ealgabivdit leat čorgen eret 18 tonna njuovvanbázahusaid njealji jagis. Ná olu eanalottit ja rievssahat eai leamaš guhkes áigái go boraspiriid lohku lea geahppánan.

Dát mearkkaša ahte ealgabivdit eaktodáhtolaččat leat čorgen eret ovtta njealjádas oasi njuovvanbázahusain mat báhcet meahccái Lierne gielddas Trøndelaga fylkkas. Ealgabivdit oidne ahte smávvaboraspiriid ja gáranasaid lohku lassánii gielddas, ja háliidedje čorget eret njuovvanbázahusaid ja ráppiid, muhto maid gieldda borramušbázahusa ja doabbargieđahallama, čállá Norgga luonddudutkan instituhtta (NINA).

– Mađe eanet olbmot leat guovllus, dađe eanet rábbeborrit leat guovllus. Ođđa dutkamat duođaštit eambbo leat ruksesriebanat ja gáranaslottit geainnuid ja bartagilážiid lahka gos gávdnet biebmu. Maiddái ráppit ja njuovvanbázahusat ealihit eanet smávvaboraspiriid ja gáranaslottiid, lohká NINA dutki Lars Rød-Eriksen.

Nord Universitehta universitehtalektor Bjørn Roar Hagen muitala sii árvvoštalle leat 12 kilo njuovvanbázahusaid juohke km²:s čakčat ovddeš Davvi-Trøndelaga fylkkas. Lierne gielddas geavahedje daid čoggojuvvon njuovvanbázahusaid seaktin bivdoáigodagas ja fuolahedje ahte ii šaddan makkárge boraspiriid biebmanbáikin. Rød-Eriksen lohká dán prošeaktaáigodagas oidno mo lottenálit lassánedje. Dát lea maid movttiidahttán báikeolbmuid bivdigoahtit eambbo ruksesriebaniid, neđiid, miŋkkaid, buoidagiid ja mivrriid ja gáranaslottiid ja ruŋkagáranasaid. Lierne gielddas lea smávvaboraspiriid lohku njiedjan, muhto ii kránnjágielddain.

-Almmuhus-