Go njuovahagat fertejit iskat visot biergguid iskan dihte lea go CWD-dávda eallis, de eai leat seamma gáibádusat bivdiin geat vuvdet bierggu njuolga olbmuide.
Go njuovahagat fertejit iskat visot biergguid iskan dihte lea go CWD-dávda eallis, de eai leat seamma gáibádusat bivdiin geat vuvdet bierggu njuolga olbmuide.
Norggas fertejit njuovahagat 51 suohkanis iskat lea go vuoiŋŋamašdávda (CWD-dávda) elliin ovdal go sáhttet vuovdit bierggu. Njuovahagat šaddet vuordit njuovvat ealli ovdal go ožžot dieđu ahte das ii leat dávda. Dat máksá ollu ruđa ja áiggi njuovahagaide, čállá Nationen.
Lassigollun njuovahagaide
– Buot iskkadeamit ja njuolggadusat lea miljovdnabealli lassigollun munnje. Dat ii leat heivvolaš, muitala njuovvi Harry Dyrstad, gii lea Steinkjera fitnodaga Vilteksperten beaivválaš jođiheaddji.
Son lea plánen oastit 1200 ealgga guovllu bivdojoavkkuin, muhto ballá ahte biebmorámbuvrrat eai oastte nu olu bierggu dál.
– Lea gullon ahte ealggabierggu ii leat várálaš borrat, ja dávda ii leat njommon olbmuide. Muhto dat ii leat doarvái. Kundarat imaštallet aŋkke «lea go son juoga boastut», ja de gullet ahte ealggabiergguid galget bálkestit mas lea vuoiŋŋamašdávda, muitala Dyrstad.
Bivdiin eai leat gáržžádusat
Dyrstad imaštallá go bivdit sáhttet vuovdit bierggu njuolga rámbuvrraide ja olbmuide, eai ge dárbbat čuovvut gáržžádusaid.
– Dát lea áibbas boastut. Manne ii diktit njuovahagaid bargat nu go dábálaččat, jearrá njuovvi Harry Dyrstad.
Biebmobearráigeahču bearráigeahččodirektevra Kristina Landsverk ipmirda go njuovahagat reagerejit, muhto muitala ahte leat praktihkalaš sivat go buot biergguid njuovahagain fertejit iskat. (©NTB)
