Dássážii dán jagi leat njuovahagat njuovvan eambbo bohccuid go diibmá dáid muttuid.
– Garra dálvvi ja guohtunroasu maŋŋel eanaš boazodoalloguovlluin, de lea hui somá oaidnit ahte njuovvanlogut ja biergobuvttadeapmi leat lassánan, muitala eanandoallo- ja biebmoministtar Sandra Borch preassadieđáhusas.
Dássážii leat njuovahagat njuovvan 35 366 bohcco, diibmá eai lean njuovvan go 34 283 bohcco dáid muttuid. Lohku lea olu lassánan ovddit guohtunroassojagiid maŋŋel, 2017:s eai njuovvan go 26 768 bohcco ja 2020:s ges 24 326 bohcco.
Gaskamearálašdeaddu bohccuin lea maid lassánan diimmážis, dán jagi lea gaskamearálaš deaddu 23,3 kilo, diimmá deaddu lei 21,6 kilo.
Doaibmabijut doaibman
Norgga Boazosápmelaččaid Riikasearvi (NBR) ja stáhta leat bures ovttasbargan guohtunroasuid čađa, ja ledje ovttaoaivilis ahte lei dárbu geavahit heahteruđaid sihkkarastit elliidčálggu ja boahttevaš biergobuvttadeami.
– Dál mii oaidnit ahte juolludeamit ja doaibmabijut leat doaibman. Mun háliidan rámidit boazodoalloealáhusa, NBR ja stáhtahálddašeaddji geat dahke erenomáš buori barggu guohtunroasus, muitala Borch.
Buorre kvalitehta bivnnuhis gálvvus
Buvttadusovdáneapmi ja ođđa biebmobagadusat leat dágahan ahte bohccobiergojohtu lea lassánan olu maŋemuš jagiid. Eambbosat fuobmájit ahte bohccobiergu lea sihke njálggat ja unnán buoidi.
Raporttat njuovahagain čájehit ahte dán jagáš bohccobierggus lea erenomáš buorre kvalitehta.
– Dát lea maid hui buorre ođas. Buorre kvalitehta ja buorre buvttadeapmi lea buorre buohkaide geat háliidivčče bohccobierggu borrat beaivválaččat ja doaluin, loahpaha Borch.
