Odne loahpahuvvo ealgabivdu eanaš guovlluin Guovdageainnus ja Kárášjogas.
Odne loahpahuvvo ealgabivdu eanaš guovlluin Guovdageainnus ja Kárášjogas.
Odne, čakčamánu 30. beaivvi, loahpahuvvo ealgabivdu bivdoguovlluin Guovdageainnus ja Kárášjogas. Dáin guovlluin álgá bivdu árabut ealgabivdu go muđui Finnmárkkus ja loahpahuvvo árabut. Fylkkasuohkan lea guhkidan bivddu Kárášjoga lulábealde bivdoguovlluid, 27 gitta 65 rádjái. Ovdalaččas lea bivdoáigi guhkiduvvon Guovdageainnus nuortalulli bivdoguovlluin, 22 rájes 43 rádjái. Goappaš guovlluin lea bivdu guhkiduvvon golggotmánu 15. beaivái. Muđui fylkkas loahpahuvvo ealggabivdu golggotmánu 31. beaivvi.
Ii šat nu stuora dáhpáhus
Ealgabivddu maŋemus beaivvi njeiddii bivdojoavku geat leat bivdán Biggeváris Guovdageainnus. Bivdojoavkkus, mas leat vihtta nissonolbmo, báhče odne iđđes árrat ealgga.
Kirsten Berit Hætta muitala sii leat ealggaid bivdán fárrolaga 16 jagi, nu ahte sidjiide ii leat šat nu issoras erenoamáš dáhpáhus báhčit ealgga.
– Lei Rávdna (Ragnhild Gaup Eira) guhte bážii ealgga dán háve, ja mii leat ovttas njuovvan ja gurpuhan ealgga geainnu lahka.
Luonddu návddašit
Hætta muitala ealggabivddu mearkkašit ollu sidjiide.
– Miidjiide lea hirbmat friddjavuohta beassat vuolgit bivdui. Mii leat dábálaš nissonolbmot geat eanaš leat ruovttus viessohommáiguin ja bivddus mii beassat vázzit meahci ja návddašit luonddu hearvásvuođa, lohká son.
Hætta maid muitala sii liikojit vázzit, ja danne lávejitge ohcat guovlluide gosa beassá biillain.
Guovdageainnus ja Kárášjogas dieđihuvvon njeidon ealggat odne diibmu 08:52 rádjái.
Earri
Sarvvis | Njiŋŋelas | Friddja | Nuorraealli | Miessi | Oktii | |
Guovdageaidnu | 17 | 0 | 61 | 37 | 9 | 124 |
Kárášjohka | 29 | 0 | 130 | 66 | 0 | 225 |
Njeidon
Sarvvis | Njiŋŋelas | Varit | Vuonjal | Miessi | Oktii | Reastaearri | Njeaidin | |
Guovdageaidnu | 21 | 6 | 10 | 6 | 11 | 54 | 70 | 43,5% |
Kárášjohka | 36 | 20 | 26 | 26 | 42 | 150 | 75 | 66,7% |