Entreprenevrrat gilvalit ortnegis doallat riikkageainnuid Davvi-Romssas, Álttás ja Guovdageainnus.
537 kilomehter guhkkosaš geaidnu vuolgá Omasvuona, Gáivuona, Ráissa ja Návuona čađa Davvi-Romssas, gitta Sennalandet bummii Álttá suohkanis. Dasa lassin vel Eurohpageaidnu 45 Álttás Guovdageidnui Suoma riikkarádjái. 55 kilomehter dáin luottain leat sihkkelastin- ja vázzingeainnut.
– Sihke báikkálaš ja nationála entreprenevrrat leat buktán fálaldaga. Mii leat duđavačča gilvvuin, dadjá Stáhta luoddadoaimmahaga huksenhoavda, Karl Martin Eriksen, preassadieđáhusas.
Gávpogis alla váriide
Entreprenevra guhte vuoitá galgá hálddašit ortnegis doallama ja divodeami luottain. Bargošiehtadus lea guoskevaš čakčamánu 1. beaivvi rájes ja bistá vihtta jagi.
– Lea miellagiddevaš bargošiehtadus mas leat iešguđet hástalusat. Gávpotjohtolagas Álttás váttisvuođaide duottarvárrái Nuovasmuotkkis, dadjá Eriksen preassadieđáhusas.
Ođđa dálkkádat ja biras gáibádusat
Stáhta luoddadoaimmahat lea čavgen gáibádusaid biras ja dálkkádatluoitin ektui buot bargošiehtadusain. Entreprenevrrat fertejit geavahišgoahtit fievrruid ja mašiinnaid mat nuoskidit unnit ja galget raporteret geavaheami boaldámušas ja energiijas. Leat maid čavgen gáibádusaid doappargieđahallamii.
Anlegg Nord AS lea buktán vuolimus fálaldaga, 468 203 495 ruvnno. Nubbin fas Veidekke Industri AS, 560 579 700 ruvdnui. Presis Vegdrift AS fálaldat lei 581 922 560 ruvnno, ja alimus fálaldat lea boahtán Mesta AS entreprenevrras 730 658 470 ruvdnui.
