Njeallje báhtareaddji, mat leat lobiheamet geahččalan rasttildit ráji, sáhttet geavvat čohkkát gitta guhtta jagi giddagasas.
Njeallje afrihkálaš bahtáreaddji leat lobiheamet geahččalan rasttildit ráji Ruošša bealde. Báhtareaddjit leat Ruoššas biddjojuvvon háldogiddagassii dan botta go ášši lea dutkojuvvome.
Golmmas sis galget leat somalialaččat, ja okta lea djiboutilaš. Okta dain Somalia stáhtaborgariin galgá leat vuolleahkásaš.
Rádjekommisára Roger Jakobsen duođašta Barents Observerii ahte dat njeallje báhtareaddji ledje geahččalan čuohpadit áiddi vai besset Norgga beallái.
Dáhpáhus galgá geavvan geassemánus, muhto ii leat almmuhuvvuon juste goas dat geavai, dahje gokko dat lei dan 196 km guhkkosaš áiddis.
Lobihis rádjerasttildeamis sáhttá leat gitta guhtta jagi giddagasráŋggáštus. Eará báhtareaddjit, mat maid leat geahččalan rasttildit ráji, leat šaddan čohkkát vihtta gitta 18 mánu giddagasas.
FSB lea mearkkašan ahte maŋemus jagi leat eambbosat go ovdal geahččalan rasttildit Ruošša ja Norgga ráji lobiheamet.
Dán dieđihit iFinnmark ja Barents Observer.
