Buot njealjis geat dušše johtolagas borgemánus ledje Nordlánddas eret, ja dán rádjái dán jagi leat 12 olbmo duššan Nordlándda johtolagas.
Njealje olbmo dušše guovtti lihkohisvuođas Davvi-Norggas borgemánus. Goappašat lihkohisvuođat ledje Nordlánddas ja goappašat lihkohisvuođain ledje persovdnabiillat.
Álggus mánu duššai 24-jahkásaš dievdoolmmoš go vujii badjelluotta fylkkageaidnu 458:s Meløy suohkanis.
Loahpageahčen mánu ges dušše golbma olbmo go vudje badjelluotta ja šadde merrii Spoalavuoli feargarukku lahkosis. 19-jahkásaš nissonolmmoš, 35-jahkásaš dievdu ja 39-jahkásaš nissonolmmoš dušše lihkohisvuođas.
Dán rádjái dán jagi leat 14 olbmo duššan 11 biilalihkohisvuođas Davvi-Norggas.
Dat lea guhtta eambbo go diibmá seamma áiggi. Gaskamearálaččat maŋemus viđa jagis leat 10-11 olbmo duššan jagi gávcci vuosttaš mánus.
Nordlánddas leat badjel beali eambbo olbmot duššan dán jagi go guokte maŋemus jagi.