Nils Gaup ja Paranord Film AS filbma lea ožžon doarjaga Norgga Filbmainstituhtas.
Rešissevra Nils Gaup ja Paranord Film AS ožžot 1 140 000 ruvnnu Norgga Filbmainstituhtas buvttadusdoarjagii dokumentárafilbmii «Bilder fra et nordisk drama» mii lea dan birra ahte gii mearrida mii lea buorre ja heajos dáidda.
Dehálaš oažžut doarjaga
– Lea hui buorre oažžut dakkár doarjaga danin go filmma bušeahtta lea badjel njeallje miljovnna ja mii oažžut ruđa Norgga Filbmainstituhtas, NRK:s ja muhtun eará gálduin, ja dieđusge veahá priváhta ruhta maid, dadjá filmma rešissevra Nils Gaup.
Filbma «Bilder fra et nordisk drama» oaččui aiddo 450 000 ruvnno Davvi-Norgga filbmaguovddážis, ja dál lea fas ožžon 1 140 000 ruvnnu Norgga Filbmainstituhtas.
– Lei gal hui dehálaš oažžut mielde Norgga Filbmainstituhta mii lea stuorimus gáldu dáppe Norggas, ja go oažžu sin mielde , de mearkkaša dat hui olu filbmii. Nu ahte filbma lea buorre prošeakta, ja lea duođaštus ahte lea buorre prošeakta, dadjá Gaup.
Gaup muitala ahte ruhtadeapmi maid ožžo Norgga Filbmainstituhtas lei sullii maid lei vuordán oažžut doppe.
Áibbas eará go drámáfilbma
– Lea dieđusge áibbas eará go ráhkadit drámáfilmma, muhto hui olusat leat ráhkadišgoahtán dokumentáraid danin go dat filmmat mat čájehuvvojit kinos dál leat hui olu supersáŋgárfilmmat, animašuvdnafilmmat ja dakkárlágan filmmat, muitala Gaup.
Gaup dadjá ahte jos áigu muitalit juoidá mii lea dehálaš ja háliida muitalit mii mearkkaša juoidá alcces, de ferte ráhkadit dokumentára.
– Hui olusat leat ráhkadišgoahtán dokumentáraid ja dat lea šaddan hui bivnnuhin maid miehtá máilmmi, dadjá Gaup.
Ii diehtán dáiddára birra
– Leat máŋga ákka manne mun háliidin juste dán filmma ráhkadit ja buoremus ágga lea goit ahte dat lei hui earenomáš muitalus. Mun oidnen govaid doppe Wienis Østerriikas vuosttaš geardde in ge lean goassige gullan dan dáiddára birra. In ge diehtán ahte son lea Norggas eret, ja lei hui imaš munnje manin in diehtán dan, muitala Gaup.
Nils Gaup muitala ahte son jearahišgođii vai gávnnaha manin lea nu.
– De fuomášin ahte lea leamaš issoras nággu ekspearttaid gaskkas doppe olgoriikkas ja Norggas. Muhtimat lohket ahte diet ii leat obanassiige dáidda ja muhtumat lohket ahte diet lea hui buorre dáidda. Nu ahte dat konflikta lea hui buorre filbmii, dadjá Gaup.
Iská mii lea dáidda
Dokumentára galgá iskat gažaldaga mii dáidda lea ja gii mearrida mii lea buorre dáidda. Dokumentáras mii deaivvadit dáiddačoggiin gii oažžu garra vuosttaldeami Norgga dáiddainstitušuvnnain maŋŋel go lea almmuhan amas ja jápmán Norgga dáiddára máinnaslihkosteami olgoriikkas.
