Niehkoprošeakta boktá internationála fuomášumi

Norgga meahcceskuovvabuvttadeaddji Alfa virgádii Andreas Orseta vázzit Norgga ruossut doarrás ovtta olles jagi.
Dát erenoamáš prošeakta lea boktán stuora internationála fuomášumi.

Ledje 1030 eará ohcci dán bargui, ja lei Andreas Orset gii válljejuvvui vázzit miehta Norgga, ja son vázzigođii njukčamánu 2016:s. Dan rájes lea son vázzán badjel guokte duhát kilomehtera, ruossut doarrás Norggas, buot jahkeáigodagaid.

Čájehit Norgga luonddu

Mihttu prošeavttain lei geahččalit Alfa-skuovaid, movttiidahttit Norgalaččaid meahcis vánddardit ja seammás čájehit man fiidnát Norgga meahcit leat.
Dan gal lea Orset nagodan, go máŋga internationála media leat čájehan beroštumi prošektii.

Earret eará lea beakkán mátkeorganisašuvdna «Lonely Planet» čállán prošeavtta birra guktii.

– Diehttelas lea somá oaidnit ahte olbmot olggobealde Norgga maid fuomášit prošeavtta. Mii diehtit ahte Norga boahtá šaddat bivnnuhis mátkebáikin, ja jus dát prošeakta sáhttá dagahit ahte eambbosat háliidit boahtit Norgii ja oaidnit norgga luonddu, de dat lea buorre. Seammás leat várra oallugat geat jurddašit mun lean mielaheapme gii mehciid váccán olles jagi, lohka Orset.

Norgga olggodaddanberoštus leavvá olles máilbmái

Earret go «Lonely Planet», lea hollándalaš «National Geographic», ja máŋgga eará riikka mátkemediat, gitta Brasilas ja Kanádas, namuhan dán norgalačča gii vázzá miehtá Norgga.
Maiddái prošeavtta sosiála mediain oaidná ahte lea alla beroštupmi olgoriikkas.

– Buohkat geat leat searvvis dán prošeavttas beroštit Norgga luonddus, ja čájehit dan erenoamáš olggodaddanmovtta mii Norggas lea. Danne lea issoras somá go ná guhkás olahit iežamet sáttasániin. Mii skuovvabuvttadeaddjit gal maid dieđus liikot go šaddá internationála beroštupmi iežamet buktagiidda. Andreas lea maid čađahan ekstremageahččaleami go lei meahccemátkkis, ja dainnalágiin addán divrras máhtu mo mii sáhttit buoridit skuovaid, loahpaha hálddašeaddji direktevra Alfas, Pål Olimb.