Norga lea okta dan logi riikkas maid Lonely Planet evttoha jagi 2022 mátkkoštanbáikin. Válljemis lea deattuhan erenoamážit ahte riikkas leat ceavzilis mátkkoštanvásáhusat gos turisttaid galledeapmi lea váikkuhan positiivvalaččat.
Buot bajimusas dan válljemis lea máilmmi smávimus riika, The Cook Islands. Norga lea beassan nuppi sadjái, ovdabealde Mauritius, mii lea válljejuvvon goalmmát buoremus riikan. Listtus leat dušše logi máilmmi 195 riikkas mielde. Lea 17. jahki go Lonely Planet evttoha guđemuš riikkas duođaid gánnáhivčče fitnat.
– Mátkeeáláhus, man vuođđu lea eanadoallu ja boazodoallu, fállá turisttaide duohta vásáhusaid mat leat vuolgán daid báikkiin ja guovlluin gos turisttat fitnet. Danin leat eanadoallu ja boazodoallu ceavzilis mátkeealáhusat, lohká eanadoalu- ja borramušministtar Sandra Borch ráđđehusa preassadieđáhusas.
