Dál šaddá álki geahččat stádabušeahta, go Ekonomiijastivren direktoráhtta rahpá ođđa neahttasiiddu.
Dál šaddá álki geahččat stádabušeahta, go Ekonomiijastivren direktoráhtta rahpá ođđa neahttasiiddu.
Dál šaddá vuosttaš háve go beassá stáda dietnasa ja goluid álkit ohcat neahtas. Neahttasiidu Statsregnskapet sihkkarastá rabasvuođa ja čađačuovgivuođa stáhtalaš ruhtageavaheamis.
Dan dieđiha Ekonomiijastivren direktoráhtta preassadieđáhusas.
Álkit gávdnat loguid
Dál sáhtát álkit gávdnat loguid, ja historjjá loguid duohken. Ovdal leat journalisttat ja hálddahus bargit šaddan ohcat Excel-fiillaid čađa gávdnan dihtii loguid. Statsregnskapet neahttasiidu čájeha álkit ja gráfalaččat movt stádarehketdoallu lea biddjon bajás.
– Rabasvuohta lea eaktun jus galgá luohttevašvuohta ja jáhkehahttivuohta, lohká finánsaministtar Siv Jensen preassadieđáhusas.
Geatnegasvuohta čájehit ipmirdahtti vugiin
– Eiseválddiin lea erenoamáš geatnegasvuohta rabasvuhtii, go mii hálddašit stuora resurssaid. Unnimus maid sáhttit dahkat lea čájehit movt vearroruđat adnojit, vai olbmot besset geahččat ja ieža veardidit movt dat orru. Rabasvuohta lea go čájeha daid loguid ipmirdahtti vugiin. Mu mielas lea dát neahttasiidu buorre ja stuora lávki rievttes guvlui, lohká finánsaministtar.
