Guovdageainnu NAV-ossodat sirdá eará lanjaide dan botta go vurdet ođđa bissovaš kantuvravistti.
Guovdageainnu NAV jođiheaddji Berit Annette Hætta muitala ahte dálá kánturlanjaid láigošiehtadus lea nohkan ja ahte šiehtadus ii leat ođasmahtton go lanjain lea beare stuora areála dan ektui go dat maid NAV Guovdageaidnu dárbbaša.
– Mii leat ohcan ođđa kantuvravistti ja mii leat dál gulahallame muhtumiiguin geat leat buktán fálaldaga. Dál fárret gaskaboddosaš kantuvrraide boares dearvvašvuođaguovddážii. Doppe galgat leahkit dassái go leat šiehttan eará bissovaš vistái fárret, muitala Hætta.
Vaikko leat sirdime ođđa gaskaboddosaš kantuvralanjaide, de lohká Hætta sin ossodaga fállat bálvalusaid nu movt dábálaččat. Ođđa kantuvralanjaid galgá maid álki gávdnat.
– Ođđa visttis lea vuostáiváldin nu movt boahtá sisa. Geavaheaddjit eai galgga mearkkašit maidege dan ektui mii dál lea, dadjá Hætta.
Čakčamánu 7. beaivvi rájes lea NAV Guovdageaidnu gávdnamis boares dearvvašvuođaguovddáža lanjain.
