Sámi vuosttaš nissongirječálli Kirste Paltto, lea fas evttohuvvon oažžut dán árvvus atnojuvvon bálkkašumi.
– Girječálli Kirste Paltto lea čehpet čállán máidnasa gándda guovtto Ritni ja Urbána, sudno gelddolaš mátkki birra Lavssiin Luohtojávrái, gos dáhpáhuvvet olu imašlaš ja somás fearánat, čállá Davvi Girji preassadieđáhusastis.
Burgán máinnasgiissá
Girjji namma lea «Luohtojávrri oainnáhusat» ja lea mánáidrománain mainna dál lea nammaduvvon Davviriikkaid Ráđi 2017 mánáid- ja nuoraid 2017 bálkkašupmái.
– Kirste Paltto lea vuot burgán máinnasgiissá ja osiid dološ oskkus ja geavahan daid vuođđun hukset mánáidromána «Luohtojávrri oainnáhusat», čállá girjelágádus.
Sunna Kitti lea sárgon ivdnás ja čáppa govaid girjái.
Vuosttaš sámi nissongirječálli
Kirste Paltto lea vuosttaš sámi nissongirječálli, su vuosttaš girji «Soakŋu» (noveallačoakkáldat) almmustuvai 1971:s.
40 jagi maŋŋá almmuhuvvui «Vilges geađgi» mánáidromána eaŋgalsgillii «The white stone».
Árvvus adnon
Diktačoakkáldagaid, mánáidgirjjiid, románaid ja noveallačoakkáldagaid lassin son lea čállán teáhterčájálmasaid ja rádiogulddalmasaid sihke sáme- ja suomagillii.
Su buvttadus lea árvvusadnon, das go oassi lea jorgaluvvon eará gielaide, ja Paltto lea maid ožžon bálkkašumiid dahje leamaš evttohuvvon bálkkašumiide.
Eará bálkkašumit
Paltto oaččui Suoma Sámedikki girjjálašvuođa bálkkašumi 1995:s ja riikkaidgaskasaš Helen-bálkkašumi earret eará iežas barggu ovddas seailluhit ja ovddidit sámegiela ja kultuvrra čállima bokte.
Noveallačoakkáldat «Suoláduvvan» lea jorgaluvvon dárogillii (Stjålet) ja lei Davviriikkaid ráđi girjjálašvuođabálkkašumi evttohassan 2001:s, ja čuovvovaš jagi son oaččui Sámeráđi girjjálašvuođa bálkkašumi seamma girjji ovddas.
Kirste Paltto ássá dál Roavvenjárggas, ja son golaha áiggi nie mo ovdal ge sátneduddjomiin ja dál maiddái sámi dujiid duddjomiin.
