Suoma kulturfoandda Lappi ossodat lea juolludan ruđaid kultuvrii ja diehtagii mannan vahkkoloahpa.
Dainna ruđain háliida Pirita Näkkäläjärvi dutkagoahtit sihke luođi mearkkašumi ja kultuvrralaš oamasteami, ja dan mo Suoma musihkas leat ávkkástallan luođi. Nu maiddái áigu guorahallat ja suokkardallat movt musihkka hukse ovdagáttuid sámiid birra.
– Suomas leat áibbas dakkár duođas dahkkon koarrabihtát ja klassihkalaš musihkkabihtát, main lea sámekultuvrra ávkkástallan, mas olggobeale olbmot váldet min luođis elemeanttaid ja barget daid vuođul, dego botnjet luođi ja buktet luođi hui stereotiippalaš čuovggas oidnosii, dadjá Näkkäläjärvi Yle Sápmái.
